Prisión con fianza pal director de la división dixital de la SGAE

MADRID, 4 de Xunetu (EUROPA PRESS)

El xuez de l'Audiencia Nacional Pablo Ruz envió a prisión eludible con una fianza de 300.000 euros al presuntu cabezaleru de la trama rellacionada cola SGAE, el director xeneral de la Sociedá Dixital d'Autores y Editores (SDAE), José Luis Rodríguez Neri. Pela so parte impunxo al sociu director de Microgenésis, Rafael Ramos, una fianza de 150.000 euros.

El maxistráu dexó sicasí llibres a la so esposa María Antonia García Pombo, y a la hermana d'ésta, Eva, dempués de preguntar mientres la xornada d'esti llunes a estos cuatro últimos deteníos na conocida como 'operación Saga'.

Acúsalos de delitos d'apropiación indebida, alministración fraudulenta y delitu societariu nel casu de Neri y d'alzamientu de bienes nel casu de Ramos.

Rodríguez Neri, pieza fundamental de la causa y primero en declarar, respondió a les preguntes del xuez y del fiscal José Miguel Alonso mientres cuatro hores y media. Dempués foi'l turnu del director de Microgénesis, Ramos, que declaró per espaciu de trés hores. A les hermanes García Pombo preguntó-yos n'últimu llugar mientres poco más d'una hora.

Esta decisión produzse dempués de que'l maxistráu decretara'l llunes la puesta en llibertá, nesti casu sin fianza pal presidente executivu de la Sociedá Española d'Autores y Editores (SGAE), Teddy Bautista, y los otros dos directivos de la entidá de xestión: el director xeneral Enrique Loras, el director económicu y financieru, Ricardo Azcoaga, y dos altos cargos de Microgénesis S.A.: la principal accionista de la empresa Elena Vázquez y el director financieru Celedonio Martín.

El maxistráu imputa a toos ellos delitos continuaos d'apropiación indebida que califica como "d'especial gravedá atendíu'l valor de la defraudación" (penáu con hasta seis años de prisión) y alministración fraudulenta (hasta cuatro años de cárcel).

Amás, nel casu de Bautista, Ruz acúsalu de la comisión d'un delitu societariu por causa de la negativa o "torga" a los socios del exerciciu de los derechos d'información y participación. Contra Elena Vázquez pesa tamién una imputación por alzamientu de bienes.

El xuez impunxo como midíes cautelares la prohibición d'abandonar el territoriu español y l'obligatoriedá de fixar una casa onde puean alcontralos. A la vista de les circunstancies de "especial enraigono n'España" de los directivos de la SGAE y de Microgénesis, nun consideró qu'esista probabilidá de fuga.