Publicada la llista provisional de 6.000 almitíos nos procesos de maestros y catedráticos de Música y Artes Escéniques

   UVIÉU, 10 Mar. (EUROPA PRESS) -

   La Conseyería d'Educación publica esti martes la llista provisional de les casi 6.000 persones almitíes y de les escluyíes pa participar nos procedimientos selectivos d'ingresu nos cuerpos de maestros y de catedráticos de Música y Artes Escéniques. La resolución figura nel Boletín Oficial del Principáu (BOPA) y a lo llargo de la mañana va tar tamién disponible nel portal institucional Educastur.

   En total, fueron almitíos 5.911 aspirantes pal concursu-oposición al cuerpu de Maestros, el 99% de los que se presentaron. Tocantes a les pruebes pal cuerpu de catedráticos de Música y Artes Escéniques resultaron almitíes 85 persones, un 94,4% del total.

   La resolución del BOPA establez diez díes hábiles, a cuntar dende mañana, pa presentar alegaciones y iguar los posibles defectos que motivaren la esclusión. Darréu va publicase otra resolución colos llistaos definitivos. Les pruebes van empezar a finales de xunu.

   La ufierta al cuerpu de maestros consta de 324 places, estremaes en siete especialidaes, que se correspuenden cola tasa de reposición de la ufierta d'emplegu públicu del 2024. Les dos disciplines más demandaes son Educación Infantil, con 1.674 aspirantes almitíos pa 50 places, y Educación Primaria, con 1.550 pa 91 puestos.

   Síguen-y Pedagoxía Terapéutica, con 868 almisiones pa 60 places; Inglés, con 591 pa 33 places; Audición y Llinguaxe, con 555 pa 60; Educación Física, con 450 pa 14, y Música, con 223 pa 16 places.

   Respectu al procedimientu pal cuerpu de catedráticos de Música y Artes Escéniques, convóquense diez places de la ufierta d'emplegu públicu del 2023, partíes n'otres trés especialidaes. La más solicitada foi Repertoriu con Pianu pa Preseos, con 44 aspirantes almitíos pa siete places, siguida de Pianu, con 23 persones pa dos places, y Composición, con 18 pa una plaza.

   Esta convocatoria, que la conseyería trabayó coles organizaciones sindicales qu'integren la Xunta de Personal Docente, inclúi tanto les places del ingresu llibre (accesu 1) como'l cupu reserváu pa profesoráu con discapacidá (accesu 2). Tamién ta abierta al funcionariau de carrera qu'aspira a adquirir nueves especialidaes (Accesu t).