Publícase 'El celtismu musical asturianu', un ensayu onde distintos espertos analicen esti fenómenu musical

GOXE PRODUCCIONES.

UVIÉU 12 Dic. (EUROPA PRESS) -

La Fundación Belenos y Goxe Producciones tán acabante de publicar 'El Celtismu Musical Asturianu', un llibru onde dellos espertos analicen esti movimientu musical y el so desarrollu n'Asturies.

Nél, trátense cuestiones distintes d'un fenómenu bien importante
nel devenir de la música d'espresión asturiana históricamente y, mui especialmente, dende los años 70 hasta l'actualidá.

Coordináu por Ignaciu Llope, les más de doscientes páxines recueyen les ponencies del XX Seminariu d'Estudios Asturianos de la Fundación Belenos, celebráu en La Puela (Ayande) en payares del 2019.

Ábrese con una 'Antoxana' escrita pol músicu gallegu Carlos Núñez, pa depués dar pasu a los diferentes artículos, ente los que destaquen 'El celtismu musical asturianu: un averamientu críticu', d'Ignaciu Llope; '¿Dexó buelga'l celtismu na música asturiana?', del director del Muséu Internacional de la Gaita, Alfonso Fernández; o 'Llembrances d'un camín iniciáticu. Notes sobre los comienzos del folk y l'interceltismu nos años 80 del sieglu XX', del ex director xeneral del Festival Intercélticu de Lorient, Lisardo Lombardía.

L'ensayu tamién inclúi los artículos 'Rock'n'gaita: cuando los celtes empuñaron les guitarres eléctriques, de Xune Elipe; y 'Diálogos ente un bouzouki y una pandereta: acordes de nostomanía y el poder de percutir piel, de Leticia Baselgas y Rubén Bada, componentes de L-R. Completándose con otros que traten sobre'l Memorial Remis Ovalle, el Festival Intercélticu de Lorient y el vigulín n'Asturies.