Publícase la tabla periódica n'asturianu pa conmemorar los sos 150 años

OFICINA DE LA LLINGUA DE XIXÓN.

UVIÉU 26 Dic. (EUROPA PRESS) -

Pa celebrar el 150 aniversariu de la publicación de la tabla periódica de Mendeléyev y esparder y divulgar la química, los elementos y les sos peculiaridaes, la Oficina de Normalización Llingüística edita una tabla periódica y una baraxa de los elementos n'asturianu.

A lo primero de la década de los 60 del sieglu XIX, na Universidá Estatal de San Petersburgo, un químicu rusu tuvo una idea que diba ser revolucionaria. Dmitri Mendeléyev propunxo representar y ordenar tolos elementos conocíos nuna tabla d'alcuerdu cola so composición y propiedaes.

Al disponelos d'esta manera principió a predicir elementos qu'entá nun se conocíen cambiando'l cursu de la investigación química pa siempres. Depués de dellos años d'investigación, en 1869, Mendeléyev asoleyó la so primer tabla periódica colos 62 elementos que se conocíen hasta la fecha colocaos horizontal según la so masa atómico y vertical en grupos o families químiques.

N'homenaxe a esti fitu científicu y col envís de poner dellos talleres n'Educación Secundaria, publícase una tabla periódica de los elementos n'asturianu con ilustraciones que muestren en qué oxetos se pueden atopar anguaño, amás d'información sobre personalidaes mui importantes pa la química universal. A la tabla súmase una baraxa de los elementos diseñada pa xugar en grupu, usando les sos característiques principales y los datos históricos y etimolóxicos de caún.