Al Qaeda asegura que lliberó a Alicia Gámez por convertise al Islam "voluntariamente"

AL ARABIYA

MADRID, 12 de Marzu (EUROPA PRESS)

Al Qaeda nel Magreb Islámicu (AQMI) aseguró, nun comunicáu publicáu pola edición dixital de la cadena de televisión Al Arabiya, que lliberó a la cooperante Alicia Gámez el pasáu miércoles dempués de convertise al Islam "voluntariamente" y por mor del "so estáu de salú".

El testu del comunicáu va acompañáu d'una fotografía na que s'aprecia a Alicia Gámez, col rostru distorsionáu y cubierta con un 'hiyab' (pañuelu islámicu), al llau de los otros dos cooperantes de la ONG Barcelona Acció Solidària, Roque Pascual y Albert Vilalta.

Nel comunicáu, AQMI da "gracies a Dios" por poner a Alicia Gámez "nel buen camín" y anuncia que la cooperante española adoptó'l nome musulmán d'Aicha y que los mesmos miembros de la organización impartiéron-y les enseñances islámiques y introduxéronla na llei islámica (la 'sharia').

Coles mesmes, AQMI afirma nel comunicáu que'l Gobiernu español tien de satisfacer les sos reivindicaciones (sin precisales), dao que ésta supón la "única condición pa garantizar la llibertá, sanos y salvos", de los otros dos cooperantes españoles. Nesti sen, pide al "pueblu español" que presione al Executivu pa qu'asuma "la so responsabilidá sobre la vida de los rehenes".