Renfe alcuerda con CAF una solución pa los trenes pero va retrasar hasta trés años la operativa

Va obligar a cambiar el contratu y les normes españoles de seguridá ferroviaria

MADRID/UVIÉU, 3 Feb. (EUROPA PRESS) -

Renfe algamó un alcuerdu con CAF, Adif y l'Axencia de Seguridá Ferroviaria (AESF) pa solucionar el problema colos gálibos de los trenes nuevos d'anchu métricu destinaos a los servicios de cercaníes y media distancia de Cantabria principalmente, pero tamién p'Asturies, País Vascu, Galicia, Castiella y Llión y Murcia.

Anque nenguna de les partes confirmó'l plazu de tiempu que va suponer iguar esti problema, valórase que la construcción de los trenes que tovía nun se pudieron fabricar va retrasase unos trés años, porque tovía falta iguar dellos trámites pa que la solución pactada pueda facese.

En concreto, la AESF tien qu'autorizar l'aplicación d'un métodu que nun recueye la normativa española pero sí la europea, y desenvolver los sos procedimientos, según informaron a Europa Press fontes de Renfe. Trátase del llamáu 'métodu comparativu', que consiste nel usu d'un tren qu'agora circula peles llinies como referencia pa los trenes nuevos, que Renfe va entregar.

CAF tamién va tener que contratar una empresa especializada na aplicación d'esti métodu y el contratu ente Renfe y la empresa va tener que modificase pa introducir un siguimientu del proyectu con esi tren de referencia. Per otru llau, Adif tamién va tener qu'apurrir los datos de caracterización de la infraestructura y comprometese a caltenela nos mesmos parámetros.

L'orixe del problema ta nos gálibos publicaos na declaración sobre la rede d'Adif, que Renfe usó pa describir les característiques técniques de los trenes nuevos nun contratu que publicó en 2019 p'adquirir 31 trenes d'anchu métricu, destinaos a renovar la flota de la rede de cercaníes y media distancia, principalmente nel norte del país.

En xunu de 2020, Renfe axudicó-y esti contratu a CAF, fabricante de trenes y autobuses con sede en País Vascu, por 258 millones d'euros. Cuando preparaba'l proyectu, CAF diose cuenta de qu'había un error nos gálibos y que les víes nun soportaríen los trenes encargaos y treslladólo al so veceru, Renfe.

ALTERNATIVES

Nesti tiempu, toles partes estudiaron les distintes soluciones posibles, como aplicar los gálibos establecíos, pero qu'obligaría a fabricar unos trenes con unes dimensiones muncho menores de les actuales, lo qu'impactaría nes prestaciones a los viaxeros.

Tamién s'estudió adaptar la infraestructura, lo que derivaría nunos plazos llargos d'execución y unos costos elevaos, o aplicar una esceición. Finalmente, decidióse'l métodu comparativu, col que toles partes, que llamenten el retrasu, creen que se va amenorgar l'impactu.

El contratu axudicáu en 2020 fixaba en 220 meses el plazu d'execución del contratu, alredor de 18 años y cuatro meses. Como incluyía'l caltenimientu a lo llargo de 15 años de delles unidaes, los trés años y cuatro meses restantes sería'l plazu pa la fabricación de los trenes, anque de normal s'entreguen de forma progresiva. Por eso, los primeros trenes tendríen que tar llistos, como tarde, n'ochobre de 2024.