Rouco (Vox) diz defender la cultura asturiana, pero refuga los espectáculos nos que se defienda la oficialidá

XIXÓN, 4 Jul. (EUROPA PRESS) -

La portavoz de Vox nel Conceyu de Xixón, Sara Álvarez Rouco, dixo esti llunes que'l so partíu defende les tradiciones y cultures asturianes pero alvirtió que nun tán d'alcuerdu en programar espectáculos que promocionen la oficialidá del asturianu.

Rouco, en rueda de prensa nel Consistoriu xixonés, salió asina al pasu de lo que considera un "tracamundiu" de les sos palabres nuna entrevista n'Onda Cero, na qu'a la entruga de si va contratar artistes n'asturianu, dixo "si puedo non, pero nunca se sabe".

Asina, insistió en que se trata d'una "polémica absurda" y repitió que na campaña electoral dixeron "una montonera de veces", que s'identifiquen dafechu cola defensa de la cultura y tradiciones asturianes y respeten "tolo rellacionao cola identidá d'Asturies.

"Somos los grandes defensores de derechos y llibertaes de les persones", aseguró, anque dixo que nun tán a favor de "la imposición de la llingua". Asina, dixo que Vox ta "a favor de los distintos bables, el so usu, pero en contra de la cooficialidá y del usu de la llingua".

Rouco criticó los 'ataques' al so partíu, con referencies al portavoz de Foru na Xunta Xeneral, Adrián Pumares, a la portavoz de Podemos, Covadonga Tomé y hasta l'Academia de la Llingua. "Vox nun vetó a naide", llegó a dicir, pa insistir en que "nunca" vetaron a nengún cantante n'asturianu y en que n'Onda Cero nun fixeron nin llanzaron nenguna propuesta nesi sentíu.

Coles mesmes, remarcó qu'en Festexos va entrar tolo tradicional y va trabayase pa tener una programación "amplia y variada y que satisfaiga a los xixoneses". Sicasí, dixo que nun quieren confundir la oficialidá cola promoción d'espectáculos n'asturianu. "Si los espectáculos van ser un apoyu a la cooficialidá, nun vamos apoyalos", repitió.

Asina, dixo que los "cantantes de siempre n'asturianu" nun tienen por qué nun contratase. A partir de setiembre van valorar la programación nueva, pero van respetar la yá contratada.