La RTPA programa conteníos especiales pola Selmana de Les Lletres dedicada a Taresa Cónsul

   UVIÉU, 5 May. (EUROPA PRESS) -

   La Radiotelevisión del Principáu d'Asturies (RTPA) va desenvolver una programación especial con motivu de la XLVII Selmana de les Lletres Asturianes, que nel añu 2026 ta dedicada a Taresa Cónsul, considerada la primer dramaturga conocida en llingua asturiana, y al teatru popular o costumista asturianu.

   Esta edición coincide, amás, col avance del espediente pa la declaración d'esti xéneru escénicu como Bien d'Interés Cultural de calter inmaterial.

   El serviciu públicu de comunicación del Principáu d'Asturies va reforciar la cobertura informativa d'esti acontecimientu cultural, atendiendo a les principales novedaes institucionales, patrimoniales y artístiques venceyaes a la Selmana, asina como a la recuperación de la figura de Taresa Cónsul y al reconocimientu del teatru asturianu como fenómenu escénicu y social de tradición bien fonda.

   Los distintos programes de Televisión del Principáu d'Asturies (TPA) van incorporar conteníos divulgativos, reportaxes y entrevistes centraes nel teatru n'asturianu, la so evolución histórica, la contribución de les muyeres a la escena asturiana, la vitalidá actual del sector y el procesu de profesionalización de les artes escéniques nel país.

   Como pieza central de la programación, el miércoles va emitise a les 22.30 hores el documental Taresa Cónsul: la lluz de la solombra. Un viaxe al orixe de la nuesa llingua que rescata la voz de Taresa Cónsul, primer dramaturga n'asturianu, y reivindica na Selmana de les Lletres Asturianes, el teatru popular como memoria viva d'un pueblu.

   Un docudrama que parte de los últimos díes de la monxa y escritora Taresa Cónsul pa rescatar del olvidu una de les voces más antigües del teatru n'asturianu. Al traviés de la representación de la so obra El Entremés, l'espectador métese dafechu nes reflexones de l'autora y nel contestu escénicu del so tiempu, acompañáu pol análisis d'espertos que revelen la repercusión, la singularidá y la vixencia del so legáu.

   A continuación, a les 23:00 hores, va emitise'l documental N'Asturies la gaita siempre ta, una producción que fai un percorríu completu pola cultura asturiana de la gaita, atendiendo a la so dimensión histórica, social, pedagóxica y artesanal, amás de la so proyección contemporánea y del procesu de reconocencia institucional como Bien d'Interés Cultural de calter inmaterial.

   La programación especial complétase coles siguientes emisiones destacaes el vienres 8 de mayu. La emisión en directu del actu institucional del 47 Día de les Lletres Asturianes dende'l Teatru Campoamor d'Uviéu, a les 19 hores. L'estrenu de la temporada nueva de Mochileros de primavera a les 22.30 hores, con Camilo acompañáu de Ferla Megía nel primer episodiu. Y la emisión del conciertu La banda sonora de la oficialidá a les 23:30 hores.