Salú anueva les urxencies pediátriques del HUCA por 648.000 euros

    UVIÉU, 21 Oct. (EUROPA PRESS) -

    La Conseyería de Salú invirtió 648.235 euros na renovación de les urxencies pediátriques del Hospital Universitariu Central d'Asturies (HUCA) p'adaptales a les nueves necesidaes de pacientes y families y reforzar la calidá de l'atención. L'actuación meyora la privacidá, amplía la capacidá asistencial y fortalez la seguridá.

   Según esplicó'l Principáu en nota de prensa, la reforma respuende a la evolución qu'esperimentó nos últimos años l'atención pediátrica urxente, marcada por una mayor presencia de neños, neñes y adolescentes con enfermedaes cróniques y necesidaes complexes, asina como pola asistencia a determinaos perfiles hasta los 18 años.

   La nueva distribución facilita una meyor adaptación a estes realidaes y favorez l'acompañamientu familiar mientres tol procesu asistencial. Amás, refuerza la intimidá de pacientes y acompañantes, gracies a la reorganización de los espacios y a la incorporación de sales d'espera estremaes según les necesidaes asistenciales.

   La conseyera de Salú, Concepción Saavedra, visitó esti miércoles les nueves instalaciones del HUCA. Dexen dar una respuesta de mayor calidá a los pacientes pediátricos y les sos families, asina como disponer d'espacios de trabayu más fayadizos pa profesionales. D'esta miente, favorezse una atención más segura, personalizada y humana, adaptada a les necesidaes de neños, neñes, adolescentes y acompañantes, valoró.

   L'actuación dexó incrementar la capacidá asistencial del serviciu per aciu la reorganización de los espacios y la creación de nueves árees específiques pa l'atención urxente pediátrica.

   Ente les principales meyores figura l'ampliación de trés a cuatro boxes d'esploración, agora zarraos y forníos con ordenador y impresora, que dexen realizar l'atención y el rexistru clínicu nel mesmu espaciu, calteniendo la intimidá de pacientes y families. La unidá dispón tamién de dos consultes polivalentes y una sala de trabayu pal equipu médicu, caltién la zona d'alministración de aerosoles y reorganiza'l circuitu de llamada de pacientes.

   Salú emprestó especial atención a la seguridá, per aciu la reorganización de los circuitos internos pa estremar, na midida de lo posible, los desplazamientos de pacientes, profesionales y materiales. Esta distribución contribúi a amenorgar el riesgu de tresmisión d'infecciones y facilita una atención más eficiente.