La Sestaferia axunta a profesoráu d'asturianu y eonaviegu p'actualizar metodoloxíes educatives

   UVIÉU, 11 Mar. (EUROPA PRESS) -

   Un total de 107 docentes d'asturianu y eonaviegu participaron esti miércoles na docena edición de la Sestaferia, un alcuentru añal promovíu pola Conseyería d'Educación pa contribuyir a l'actualización pegagógica d'esti profesoráu celebráu en La Felguera, conceyu de Llangréu. La xornada tuvo por títulu 'Anovación na enseñanza de Llingües. L'asturianu y l'eonaviegu nes nueves etapes educatives. Meyora de les competencies comunicatives'.

   La directora xeneral d'Inclusión Educativa y Ordenación, María Dolores Bueno, aseguró mientres la inauguración institucional que'l Gobiernu del Principáu sigue trabayando pa consiguir la especialidá docente d'asturianu y eonaviegu.

   "Sabemos que ye una demanda xusta del profesoráu y un pasu imprescindible pa garantizar la estabilidá, la calidá y la reconocencia académica que merecen les nuestres llingües propies, comentó. Poro, esi compromisu forma parte de la nuestra fueya de ruta y vamos siguir impulsando tolos pasos necesarios pa facelo realidá", añedió.

   Bueno estimó'l llabor siguíu d'esti colectivu docente, que fizo posible dellos llogros históricos, como la introducción nesti cursu de les llingües autóctones nel segundu ciclu d'Infantil y na Escuela Oficial d'Idiomes. Tamién emponderó a los grupos de trabayu específicos pa crear nuevos materiales pedagóxicos, que la so última aportación foi precisamente pa Educación Infantil.

   El públicu asistente --compuestu nun 80% del profesoráu d'Infantil y Primaria y el 20% restante, de Secundaria y Bachilleratu-- escuchó dos ponencies sobre la novedosa enseñanza de la llingua autóctona na etapa d'Infantil, al cargu de Loreto Díaz, y sobre nuevos materiales disponibles pa desenvolver les competencies comunicatives, de Pablo Rodríguez.

   El programa completóse con diferentes talleres prácticos, celebraos nel Espaciu Arkuos y nel CIFP de Caltenimientu de Servicios a la Producción, rellacionaos coles mentaes ponencies y so la supervisión de docentes con acreditada esperiencia. Los participantes ellaboraron, amás, una propuesta didáctica real y espunxéronla a la fin de la xornada, con un premiu a la meyor iniciativa pa cada etapa educativa. La sestaferia concluyó con un conciertu de Herbamora.