"Si daquién quier ser Spiderman que nun m'obliguen a pagar la capa", afirma Foru de la Familia sobre la transexualidá

UVIÉU, 17 Ene. (EUROPA PRESS) -

El representante del Foru de la Familia n'Asturies, Ángel Mario Díaz Gutiérrez, comparó la transexualidá con "dalgo estético" como pue ser una intervención dental, polo qu'al so xuiciu ye dalgo que nun tienen que pagar les alministraciones públiques. Coles mesmes, comparó reconocer derechos al colectivu transexual con llexislar pa que daquién pueda ser tratáu como Napoleón o Spiderman o, mesmamente, colos anoréxicos.

Asina lo indicó esti xueves na Comisión de Presidencia y Participación Ciudadana de la Xunta Xeneral nes comparecencies informatives sobre'l proyectu de Llei del Principáu d'Asturies de garantía del derechu a la llibre espresión de la identidá sexual y/o de xéneru.

"Si yo entró equí y punxera un sombreru napoleónicu y proclamara que soi Napoleón y esixo que se me trate como tal qué pensaríemos", preguntóse'l representante del Foru de la Familia, que dixo que naide diba echar por eso "a correr" pa reconocer el derechu de los que se sienten Napoleón "pa que sían trataos como Napoleón".

"Si daquién quier ser Spiderman yo nun me tengo que m'oponer, pero que nun m'obligue a que-y pague la capa", proclamó, pa comparar la condición d'un transexual con una persona que perdió'l dentame. "Los implantes nun los paga la Seguridá Social, tien que pagalos del so bolsu porque ye dalgo estético", indicó, pa calificar la transexualidá d'estético tamién, "polo que nun esixan que lo pague'l restu de la sociedá".

Coles mesmes, comparó aprobar una llei pa protexer al colectivu transexual cola anorexia. "A los anoréxicos trataríamos d'ayudalos y intentaríamos torgar esa deriva autodestructiva que los llevaría a la muerte", señaló.

Ángel Mario Díaz Gutiérrez, qu'intervieno a propuesta del Grupu Parllamentariu Foru Asturies, calificó esta norma de "totalitaria y innecesaria" y de buscar "imponer una condición". Otra manera, fixo referencia a una presunta llei danesa qu'obliga a los varones a mexar sentaos "y esta llei ye asemeyada al imponer unos estereotipos que nun son naturales".

Unes opiniones que retrucó'l vicepresidente de la Federación Estatal de LGTB y representante de Xente Gai Astur (XEGA), Mané Fernández, que recordó qu'él nun ofendiera a naide na comparecencia y na so condición de persona transexual él sí se sintió ofendíu, nuna clara referencia a les palabres del miembru del Foru de la Familía.

Amás, Fernández recordó que los transexuales tamién tienen caries y que podíen llegar a podese d'alcuerdu pa manifestase pa que sía dalgo de lo que s'ocupe la sanidá pública. Coles mesmes, depués de mentar que tuvo que colar del so país pola so condición, manifestó que'l tema dental nun ye dalgo polo qu'una persona sufra insultos y agresiones o mesmo ser refugáu nun trabayu, dalgo que sí sufre'l colectivu LGTB según recordó mentando pa ello la última agresión a un mozu gai esta fin de selmana en Barcelona.