UVIÉU 26 Oct. (EUROPA PRESS)
El Serviciu d'Emerxencies del Principáu d'Asturies (SEPA ) y catorce preses de la rexón van activar esti miércoles 28 d'ochobre, en manera de prueba , el sistema acústicu de serenes d'emerxencia disponible p'alvertir d'una posible catástrofe . Son les preses de Valdemurio, Priañes, Valduño II , Valle II , La Florida , La Barca , Tañes, Ruseco , Salime, Doiras, Arbón, San Andrés de los Tacones, La Granda y Trasona .
La finalidá d'esti exerciciu ye que la población que pudiera vese afectada en casu de frayatu de la presa sepa cómo actuar. Fundamentalmente qu'identifiquen esti soníu y sepan qué midíes de autoprotección tienen d'aplicar, la principal, alloñase de los calces de los ríos y regueros y allegar a sitios elevaos.
El soníu d'estes serenes algama aquelles zones que quedaríen anubiertes na primera media hora dende el frayatu de la presa . Les serenes de cada presa actívense toes al empar pero cada instalación va realizar la so prueba de forma individual y según l'orde consensuáu nel comité d'implantación.
Los responsables de cada instalación van comunicar al 112 l'activación de les serenes col soníu d'alerta y pasaos aprosimao unos 10 minutos van dar voz de l'activación de les serenes col mensaxe indicativu de fin d'alerta.
El soníu d'alerta consta de 3 tramos d'un minutu de duración, con soníu ascendente , dixebraos por intervalos de 5 segundos de silenciu . El de fin de l'alerta ye una señal siguida de 30 segundos.
Na preparación del exerciciu , amás de los titulares de les preses, tuvieron un papel bien destacáu tolos conceyos implicaos emitiendo los correspondientes bandos informativos y poniendo a disposición a los sos policías locales y a les sos agrupaciones de voluntarios de Protección Civil. La mesma Confederación Hidrográfica del Cantábricu que va esplegar los sos propios axentes medioambientales en delles zones.
Dende el SEPA tamién destaquen la disposición amosada dende Delegación de Gobiernu cola participación de la Guardia Civil y la Policía Nacional y dende el Gobiernu del Principáu , amás del SEPA y los parques de Bomberos d'Asturies allugaos nestes zones, púnxose a disposición a los axentes de la Guardería de Mediu Natural.