Tresportes refuga revisar el peaxe del Güerna y Asturies va dir al Tribunal Supremu

   UVIÉU, 15 Abr. (EUROPA PRESS) -

   El Ministeriu de Tresportes y Movilidá Sostenible refugó la solicitú del Gobiernu asturianu de revisar la prórroga del peaxe del Güerna, na AP-66. Asina lo confirmó'l conseyeru de Movilidá, Mediu Ambiente y Xestión d'Emerxencies del Gobiernu asturianu, Alejandro Calvo, que dixo que l'Executivu rexonal va dir agora al Tribunal Supremu coles mires d'esaniciar el peaxe de l'autopista que une Asturies con Llión.

   Nuna rueda de prensa esti miércoles, Calvo informó de que'l ministeriu decidió refugar el pidimientu realizáu pol Gobiernu del Principáu pa que se revisara'l peaxe "ensin analizar si la prórroga ye llegal o non", llindándose a señalar que pasó demasiáu tiempu desque s'aprobó. "Nun s'entra no fondero del problema, que ye lo que de verdá importa", afirmó.

   "El Gobiernu d'Asturies pidió una revisión seria y completa", argumentó'l conseyeru, "porque tamos falando d'una decisión que sigue teniendo efectos güei".

   Precisó que la prórroga empezó a aplicase realmente en 2021, cuando la concesión orixinal tenía de terminar. Poro, según sorrayó, "nun ye un asuntu del pasáu", sinón una situación que "lleva solo cuatro años a valir" y que sigue afectando acaldía a miles de persones. "Por eso nun ye razonable negase a analizala", añedió.

   Calvo recordó que l'ampliación de la concesión aprobada nel añu 2000 y supunxo allargar el peaxe 29 años más, hasta 2050. "Esa decisión condiciona la movilidá ente Asturies y la meseta y perxudica a la ciudadanía y a les empreses asturianes", afirmó.

   Calvo aportunó en que'l peaxe "supon un sobrecostu permanente" y tien un impactu directu na competitividá d'Asturies: "Nun ye una cuestión teórica nin xurídica: afecta al día ente día de la xente.

   Por tollo, Alejandro Calvo anunció que'l Gobiernu d'Asturies va presentar un recursu énte'l Tribunal Supremu pa que se estudie'l fondu del asuntu. "Asturies nun va arrenunciar a defender los sos intereses y a pidir una revisión xusta y tresparente d'esta prórroga", remarcó.