'Txelis' y 'Pikabea' dicen qu'ETA "nun tuvo en cuenta la opinión de la mayoría de los presos al frayar la última tregua"

EP

BILBAO, 22 de Febreru (EUROPA PRESS)

L'ex responsable del aparatu políticu d'ETA, José Luis Álvarez Santacristina 'Txelis' y l'ex dirixente del aparatu militar de la banda, Kepa Pikabea (na imaxe), critiquen qu'ETA "nun tuvo en cuenta la opinión de la mayoría de los presos al romper la tregua" y consideren que la llucha armada ye "inútil" y una "torga" pa la unidá 'abertzale'.

Estes manifestaciones se recueyen nuna misiva, de fecha payares del 2007, y escrita íntegramente n'euskera, na que treslladen a los reclusos de la banda la so desvinculación de la estructura y la disciplina del Colectivu de Presos d'ETA (EPPK).

Precisamente, el pasáu domingu se facía públicu un comunicáu d'EPPK, nel qu'informen de la so decisión de "espulsar" a 'Txelis' y 'Pikabea' por "sumase a la estratexa emprendida pol Gobiernu d'Estáu pa dividir" al colectivu.

Na carta de dambos ex dirixentes d'ETA, dada a conocer por Noticias de Gipuzkoa, informen a los presos de que van siguir "el so propiu camín" dempués d'una refllexón y tres llelgar a la "firme" conclusión de que la llucha armada nun sólo foi "inútil" nel camín de "lliberar a Euskal Herria", sinón que tornó nuna "torga" pa "llograr niveles más altos d'autogobiernu" y llevar p'alantre una política "eficaz" en favor de l'autodeterminación del pueblu vascu, al torgar la "unidá ente los abertzales".

"Nun tamos d'alcuerdu cola estratexa política armada, que s'impunxo otra vegada porque hai muncho que pensamos que nenguna estratexa armada pue valir pa ofrecer una salida sensata al conflictu políticu que vive Euskal Herria", afirmen.

Na carta, escrita dende la prisión de Logroño, na que dambos tán encarcelaos, aseguren que la so oposición a la "estratexa política armada" ye frutu d'años de reflexón y añaden que "firmes criterios políticos, sociales y éticos" lleváronlos "hai munchos años" a esa conclusión, tal como, según recuerden, esplicaron hai diez años nel documentu "Abertzaleon estrategiaz".

"ERRORES".

Al so xuiciu, na última década se produxeron "cambios" y, independientemente de les "responsabilidaes y los errores" cometíos por "unos y otros" nos dos últimos procesos de paz fallíos, en referencia a Lizarra y Loiola, almiten que "lo que se ta cuestionando dende hai muncho dientro de la política vasca abertzale ye l'afayamientu y la llexitimidá de la lluchar armada, tiendo en cuenta la voluntá del nuesu puesblu y viendo les munches y graves traxedies que conllevó la estratexa armada".

Nesti sen, critiquen qu'ETa nun tuviera en cuenta "la opinión de la mayoría de los presos" al tomar la decisión de romper la última tregua.

Na carta, los dos ex dirixentes d'ETA recuperen parte del documentu "abertzaleon estrategiaz", al considerar que les reflexones d'esti escritu son gúei "más clares". En concreto, faen referencia a la desllexitimación de la violencia per parte de la sociedá vasca, la violencia como principal motivu de división ente abertzales y la "utilización" del conflictu armáu per parte del Estáu Español.

En relación a la primera, piensen que la mayoría de los ciudadanos vascos, y tamién dientro de la izquierda abertzale, refuga la llucha armada. Nesti sen, avalen l'apuesta de dalgunos "cualificaos" referentes políticos de la izquierda aberzale que "tán reivindicando a glayíos dende hai muncho tiempu" la necesidá de "humanizar el conflictu y ponelu en parámetros políticos".

Per otra parte, alvierten que pa llograr cualquier oxetivu soberanista ye necesaria "la unidá ente abertzales" y, al so xuiciu, la llucha armada tornó nuna "torga" pa llograla, como p'algamar "niveles más altaos d'autogobiernu y pa llevar p'alantre una llucha política unida y realmente eficaz a favor de l'autodeterminación".

Amás, 'Txelis', espulsáu d'ETA en 1998, y 'Pikabea', consideren que la llucha armada sólo benefició a "los enemigos d'Euskal Herria", que vienen "sacando provechu del conflictu armáu pa rentabilizalu política y socialmente, lo que perxudica'l nuesu presente y futuru".

"Nun sólo asumen la llucha armada, sinón que la tornaron nun inmeyorable comodín p'actuar a la escontra de la identidá y l'autodeterminación. Cola escusa de la llucha armada tán poniendo torgues y arruinando una y otra vez cualquier iniciativa (política, socioeconómica y llingüística) creada en beneficiu d'Euskal Herria", apunten.

Por ello, piensen imprescindible un exerciciu de "autocrítica" y reafirmen la so apuesta por una estratexa política que "respete tolos derechos humanos, ensin dermora y ensin esceiciones".