URA esixe midíes "urxentes" contra la fauna selvaxe énte'l "esmolecedor" aumentu d'ataques na rexón

   UVIÉU, 21 Abr. (EUROPA PRESS) -

   La organización Unión Rural Asturiana (URA) reclamó esti llunes la puesta en marcha "yá" de midíes de control de la fauna selvaxe énte'l "esmolecedor" aumentu d'ataques y acercamientu a zones poblaes en prácticamente tol territoriu asturianu. "La situación ye de máxima gravedá yá que tantu'l llobu como l'osu perdieron el mieu y tarrecemos ataques inminentes sobro les persones", sorrayaron.

   Nuna nota de prensa detallen que nos últimos díes llegaron-yos denuncies de Quirós, Terverga, Candamo, Colunga, Tinéu y Llanes. Nel casu de Colunga, según indicaron, los llobos mataron a un xatu nel pueblu de Pernús, a dos kilómetros escasos de la villa de Colunga; en Candamo, el guarda certificó ataques en Agüera y los ganaderos tán sufriendo baxes tamién nel pueblu de Villar, na falda de la sierra de Pedroso; y en Llanes, na Sierra del Cuera sigue la masacre con xates devoraes y otra mancá que terminó morriendo.

   Na mesma nota de prensa añeden qu'en Teberga "l'osu sigue causando estragos y nos últimos díes mató una novilla y una tenral" y "los depredadores, que nun entienden de diferencies, lleváronse per delantre les oveyes de la familia del director xeneral de Planificación Agraria, Marcos Da Rocha, en Navelgas".

   "Como vien siendo costume, el tiempu vuelve a danos la razón y cola llegada de la primavera, la suelta de ganáu ta convirtiéndose nuna auténtica carnicería", concluyeron.