La vacunación del gripe n'Asturies, con cita previa anguaño pa facer frente a una temporada "impredicible"

UVIÉU, 6 Oct. (EUROPA PRESS) -

La directora xerente del Serviciu de Salú del Principáu d'Asturies, Concepción Saavedra, y el xefe del Serviciu de Vixilancia Epidemiolóxica, Ismael Huerta, presentaron esti martes la campaña de vacunación contra'l gripe pal periodu 2020/2021. Va ser una temporada "impredicible" sobre la incidencia, según almitió Huerta.

Les vacunes, que van empezar a alministrase a partir del día 13 d'ochobre, van suministrase enantes en centros sociosanitarios, yá a partir d'esta selmana, porque'l Principáu decidió da-yos prioridá.

Ún de los oxetivos d'esa cita previa ye precisamente que nun se produzan acumuladures nos centros de salú. Pa eso, amás, van habilitase otres zones, como polideportivos o frontones en delles zones del Principáu.

En total, Asturies va disponer de 387.124 dosis pa esta campaña, cola posibilidá d'ampliar n'otres 15.000, según esplicó Huerta. Existen cuatro tipos de vacunes en función de les persones que decidan ponela.

Una de les novedaes de la campaña 2020 de la vacuna del gripe ta na inclusión na población 'diana' como grupu de riesgu a les muyeres nel puerperiu (hasta seis meses dempués del partu) nel casu de que nun foren vacunaes na xestación.

Ente los oxetivos d'anguaño ta llograr el 75% o más ente los mayores de 65 años y el personal sanitario, según esplicaron.

MORTALIDÁ Y PROFESIONALES

La convivencia cola COVID-19 va marcar esta campaña na que los responsables asturianos insistieron na necesidá de vacunase. Preguntáu sobre lo qu'espera sobre la incidencia del gripe, Huerta dixo que l'escenariu ye "impredicible", anque existe la posibilidá de que nun sía una incidencia tan alta como otros años poles midíes de seguranza que ta tomando la población.

A pesar del llamamientu de tolos años de les autoridaes al personal sanitario pa que se vacune, lo cierto ye que los profesionales que lo faen vienen rondando'l 30 por cientu. Huerta preve qu'anguaño sían más los que se vacunen. "L'andanciu fíxo-yos abrir más los güeyos", señaló.