Vanesa Gutiérrez diz que'l proyectu de la Llei de Cultura y Identidá d'Asturies yá ta bien avanzáu

   UVIÉU, 12 May. (EUROPA PRESS) -

   La conseyera de Cultura, Política Llingüística y Deporte del Principáu, Vanesa Gutiérrez, manifestó esti martes nel Plenu ordinariu que'l pasáu mes de setiembre'l presidente del gobiernu, Adrián Barbón, anunciaba una Llei de Cultura y Identidá d'Asturies, onde se regularen y garantizaren tanto los derechos culturales como los derechos llingüísticos y anguaño, tres de la fase de consulta pública previa, el proyectu "ta bien avanzáu y esperen que salga bien llueu".

   Gutiérrez respondía a una pregunta de la diputada del Grupu Mistu, Covadonga Tomé, que interesóse pola situación na que ta la tramitación de la reforma de la Llei d'Usu y Promoción del Asturianu.

   Indicó la titular de Política Llingüística que sobre esi proyectu pue avanzar qu'introduz dellos cambeos sobre la Llei d'Usu que complemente esa Llei de Cultura que con un oxetu más ampliu que dé un tratamientu tresversal de les llingües propies, incluyida la formulación de los derechos llingüísticos nel ámbitu cultural.

   Pela so parte Tomé indicó que "faen falta meyores clares y tanxibles cola protección, la promoción y la normalización social de les nuestres llingües propies" y alvirtió que "frente a los discursos d'odiu, y frente al faltosismu'l meyor antídotu ye'l respetu y la consecución de derechos pa toes aquelles persones que llibremente quieran facer usu de les llingües".

   Llamentó Tomé que "vivimos tiempos de negacionismu y d'odiu y tamién nel planu llingüísticu y denunció que nesta mesma Cámara, desgraciadamente, hai que sufrir intervenciones que devasen lo tolerable, faciendo gala d'un amiestu d'ignorancia, mala fe y bien pocu respetu", poniendo d'exemplu la intervención esti mesmu llunes del diputáu de Vox, Javier Jové.

VOX PREGUNTA SI MOLA FALAR ESPAÑOL

   Y ye que primeramente, el diputáu Javier Jové, preguntó a la conseyera si mola falar n'español, una pregunta que sirvióy pa cargar contra l'asturianu al que volvió dirixise como "asturélfico".

   Jové estimó que acabara yá la celebración de la Selmana de Les Lletres. "Vaya turra dieron", dixo Jové qu'acusó al Gobiernu asturianu de politizar el Día del llibru.

   Vanesa Gutiérrez destacó la necesidá de trabayar pa "combatir los prexuicios y ideoloxíes sobre les llingües minoritaries, de forma que la diversidá y la diferencia concíbanse como de daqué positivu y como recursos valiosos".

   Añedió que l'informe que cada dos años arrama'l Conseyu d'Europa evaluando les polítiques, diz a Asturies munches midíes que tien que poner en marcha, ente otres la educación, pero principalmente la más importante y urxente ye avanzar na reconocencia del asturianu como idioma oficial nel estatutu d'autonomía.

   La conseyera amás tiró d'ironía pa dar les gracies al diputáu de Vox, Javier Jové por utilizar el verbu molar proviniente de la llingua romanina, que ye la del pueblu xitanu "una llingua minorizada". "Munches gracies por visibilizar al pueblu xitanu y la so cultura na formulación de la so pregunta", indicó la conseyera.