Actualizado 28/12/2017 16:39 CET

Villaviciosa entama un taller d'asturianu

Cartel del cursu.
SNL COMARCA LA SIDRA.

UVIÉU, 28 Dic. (EUROPA PRESS) -

La Comarca de la Sidra, en collaboración col Conceyu de Villaviciosa y l'Atenéu Obreru de Villaviciosa, entama un taller d'asturianu nel Atenéu. Trátase d'un cursu que naz cola idea de crear un espaciu d'aprendizaxe y perfeccionamientu de les habilidaes comunicatives en llingua asturiana, tanto nel planu d'espresión y comprensión oral como escrito. Les sesiones van ser ente'l 17 de xineru y el 21 de marzu tolos miércoles de 18.00 a 20.30 hores.

L'actividá ta enfocada dende una perspectiva fundamentalmente práctica y de fomentu del coaprendizaxe, polo que va dirixida a toa persona interesada n'ampliar los sos conocimientos sobre llingua asturiana independientemente del so nivel.

Les sesiones tarán dividíes en dos partes. La primera tará dedicada a la espresión escrita, partiendo de les producciones del alumnáu pa correxir y repasar les normes ortográfiques y gramaticales amás d'ampliar los recursos sintácticos y de vocabulariu. La parte oral va tentar de quitar mieos a la hora d'intentar mandase del asturianu pa les situaciones comunicatives más diverses, corrixendo errores y buscando un modelu natural y prestosu de llingua falada.

Nel taller va dase atención, igualmente, a les producciones culturales actuales en llingua asturiana, asina como a tolos elementos sociollingüísticos que condicionen el so desarrollu y evolución historicamente y n'actualidá.

Los interesaos puen apuntase hasta'l 17 de xineru unviando los sos datos a los correos electrónicos normastur@lacomarcadelasidra.com o secretaria@ateneovillaviciosa.es. Tamién al traviés del teléfonu 985890275 o al traviés de la páxina de facebook del Serviciu de Normalización Llingüística de la Comarca de la Sidra.