Xuan Santori defende n'asturianu la so tesis sobre los escritores del surdimientu

UVIÉU, 20 d'Avientu (EUROPA PRESS)

El pasáu vienres 16 d'avientu tuvo llugar l'actu de llectura y defensa de la tesis doctoral de Xuan Santori Vázquez, titulada 'El papel de los escritores del Surdimientu na recuperación del asturianu: la visión del escritor', y dirixida pol doctor Ramón de Andrés Díaz. Trátase d'una tesis redactada en llingua asturiana.

El tribunal tuvo presidíu pol catedráticu asturianu afincáu na Universidá del País Vascu, Dr. Francisco José Llera Ramo, autor d'importantes trabayos sobre sociollingüística asturiana. La calificación de la tesis doctoral foi de Sobresaliente "Cum Laude". Al actu, celebráu na Facultá de Filosofía y Lletres de la Universidá d'Uviéu, asistió bien de públicu.

El doctorandu Xuan Santori Vázquez fizo la defensa de la so tesis n'asturianu, llingua que tamién emplegó una parte del tribunal.

Según comunicó'l propiu director de la tesis, dase la circunstancia de qu'esti trabayu doctoral ye'l primeru que se tramitó dafechu en llingua asturiana, acoyéndose al nuevu reglamentu que'l Rectoráu aprobó nesti mandatu. Esti fechu foi destacáu pol tribunal calificador. (La primer tesis en llingua asturiana, de Ramón d'Andrés y dirixida por Ana María Cano -actual presidenta de l'Academia de la Llingua-, defendióse na Universidá d'Uviéu en 1988).

La investigación de Xuan Santori Vázquez (filólogu y escritor) refierse a la influencia de los escritores n'asturianu nel movimientu lliterariu y sociocultural llamáu Surdimientu, qu'entamó nel añu 1974 y llega hasta güei. Esta influencia estúdiala Xuan Santori al traviés de la percepción de los propios escritores, gracies a los datos llograos nuna macroencuesta fecha a prácticamente tolos escritores n'asturianu. La gran cantidá de datos estadísticos permiten facer un retratu escepcional de les interioridaes y característiques del mundu lliterariu asturianu nos últimos 30 años.

Tal como destacaron dellos miembros del tribunal, la metodoloxía utilizada nesta investigación ye mui novedosa y podría aplicase tamién a otres situaciones de lliteratures minoritaries.