'Zarreu Fest' celebra la so segunda edición esti fin de selmana con música, cultura y reivindicación rural

   UVIÉU, 27 Jun. (EUROPA PRESS) -

   La localidá de Zarréu, en Degaña, acueye dende esti vienres y hasta el domingu una nueva edición del 'Zarreu Fest', la denominada "sestaferia cultural nel monte", que torna per segundu añu con una programación ampliada d'actividaes culturales, musicales y de reflexón social, en plenu corazón del Parque Natural de Fontes del Narcea, Degaña y Ibias.

   Entamáu pola asociación xuvenil Asamblea Moza d'Asturies en collaboración con vecinos del conceyu, asociaciones del territoriu, docentes del Colexu Públicu de Zarréu y pequeños comercios locales, el festival busca convertise n'una referencia cultural y de dinamización rural n'una zona que sigue enfrentando los efectos del zarru de la minería y la despoblación.

   El cartelu musical inclúi conciertos gratuitos con bandes y artistes de distintos xéneros. Esti vienres 27 de xunu van actuar A Tralha da Terra dos Montes, Herbamona, Espropiación y Avante'l Pueblu DJ. El sábadu 28 va ser la vez de Os Trimendos, Algaire, Corquieu y Skama la Rede, cerrando la nueche los DJ Les Heteronas y AMA Asturies, Odia'l Fascismu. El festival va cuntar con zona d'acampada gratuita tol fin de selmana.

   Más allá de la música, 'Zarreu Fest' va incluyir una programación cultural que va encetar les realidaes del mundu rural. Ente les actividaes previstes tán la inauguración d'una esposición sobro la emigración del suroccidente asturianu, una mesa redonda sobro mocedá, despoblación y desenvolvimientu local cola participación de Edilberto Rodríguez y vecinos de la zona, y la presentación del llibro 'Don Vito', centráu na figura del empresariu mineru Victorino Alonso.

   Va desenvolvese tamién una sesión del proyectu Texendo Redes, en collaboración cola asociación La Ponte, centráu na recuperación del patrimoniu oral musical del suroccidente asturianu. Tol fin de selmana va haber un mercáu tradicional con productos locales y artesanales, según ufierta gastronómica, incluyendo la presencia d'un pulpeiro.

   Dende l'Asamblea Moza d'Asturies señalen qu'esti tipu d'iniciatives son "necesaries pa reactivar una contorna que llucha por caltener viva la so identidá nun contestu d'aislamientu xeográficu y perda de población". El festival, aseguren, busca ser "un impulsu colectivu que demuestre'l potencial d'esta tierra p'allugar proyectos culturales de calidá".