UVIÉU, 07 d'Ochobre (EUROPA PRESS)
Bloque por Asturies denunció güei públicamente que l'amortización de los 17 puestos de trabayu de personal fixu y eventual de les piscines de Pénjamo y Riañu (Llangréu) ye una midida acordada pol Conseyu de Gobiernu, formáu polos conseyeros del Partíu Socialista y Izquierda Unida-Los Verdes, coalición qu'anteriormente abandonare la organización nacionalista d'izquierdes.
El voceru del Bloque, Rafael Palacios, dio cuenta esti xueves en declaraciones a Europa Press d'un documentu de la Conseyería de Cultura y Deportes, nel que se reflexa que la midida aprobóse nel Conseyu de Gobiernu del 4 d'agostu pasáu.
El responsable del Bloque calcó en que'l Conseyu de Gobiernu ta formáu por representantes de les dos formaciones qu'integren l'Executivu autonómicu. Informó nesti sen dempués de protagonizar una rueda prensas, xunto col diputáu de la formación, Roberto Colunga, pa criticar la situación que vive la plantiya d'ambos centros deportivos.
Na mesma, alertó que'l zarru de les piscines podría afectar a tolos trabayadores, lo que se contradiría colo señaláo dende l'Alministración autonómica, que prometió la reubicación polo menos de los cinco emplegaos de carácter fixu.
Según Palacios, la situación nun sólo afecta a los interinos o eventuales, "tamién a algunos fixos". Por esti motivu, consideró la situación de "estrema gravedá" y sospecha que l'oxetivu del Gobiernu autonómicu "ye acabar con tolos puestos de trabayu".
La plantiya total nesti momentu ye de 22 emplegaos, de los que sólo cinco tienen carácter fixu. Amás, hai cuatro interinos y 13 temporales, contrataos únicamente demientres los meses de branu.
