Alokairurako babes ofizialeko 192 etxebizitza eraikitzen hasiko dira otsailean Tolosako Amarotz paper fabrika zaharrean

DONOSTIA 22 (EUROPA PRESS)

Eusko Jaurlaritzako Etxebizitza eta Hiri Agenda Sailak otsailean hasiko ditu Tolosan (Gipuzkoa) alokairuko babes ofizialeko 192 etxebizitza eraikitzeko lanak, Amarotz paper fabrikako 20.1 esparruko 2.1 eta 2.2 lursailetan dauden bi sustapenetan banatuta, Denis Itxaso arloko sailburuak ostegun honetan iragarri duenez.

Gainera, Itxasok jakinartazi du Tolosa tentsionatutako eremu izendatuko dutela ofizialki datozen egunetan, Estatuko Buletin Ofizialak hiruhilekoko zerrenda eguneratzen duenean.

Eraikuntza lanak Construcciones Sukia Eraikuntzak S.L. enpresari esleitu zaizkio, 24.247.767,21 euroko (gehi BEZ) aurrekontuarekin (eraikuntza, lotutako urbanizazioa eta deskontaminazioa), eta 34.765.862,94 euroko inbertsioarekin. Lanak egikaritzeko 24 hilabeteko epea ezarri da.

Itxasok adierazi du abenduaren 10ean sinatu zutela kontratua Visesak eta enpresa esleipendunak. Beraz, zehaztu duenez, "lanak datozen hilabeteko lehen hamabostaldian hasiko dira", zuinketa akta sinatu ondoren, "eta, aurreikuspenen arabera, 2028ko bigarren seihilekoan entregatuko zaizkio etxebizitzak Alokabideri".

Lehenengo sustapena 2.1 lursailean kokatzen da, eta Alokabidek kudeatuko dituen alokairuko babes ofizialeko 111 etxebizitza ditu. Egikaritze proiektua eta obra zuzendaritza Pedro Apaolaza y Asociados enpresarenak dira. Proiektuak bi bloketan antolatutako eraikuntza bat proposatzen du, 'L' bat osatuz, lursailaren zati bat liberatuz eta barruan egoteko eta sarrerarako espazioak sortuz.

Multzoak sotoko bi solairu izango ditu garajeetarako -sarrera Amarotz kalean-, eta beheko solairu bat, bi atari independenterekin. Horien gainean bederatzi solairu egingo dira, modu honetan banatuta: logela bateko 30 etxebizitza, bi logelako 65 etxebizitza -horietatik bost mugikortasun urriko pertsonentzat egokituak, eta hiru logelako 16 etxebizitza.

Bigarren sustapena, 2.2 luresailean, alokairuko babes ofizialeko 81 etxebizitzak osatuko dute. Obraren egikaritze proiektua eta zuzendaritza WARQS oficina de arquitectura SLP enpresaren kontura izango da. Kasu honetan, programa bi eraikin independentek osatzen dute: bata beheko solairuak eta goiko bederatzi solairuk osatua, eta bestea beheko solairuak eta zortzi solairuk osatua.

Eraikinek sotoko bi solairu partekatu dituzte azpian -garajeetara bideratuak-. Etxebizitzen banaketa honako hau izango da: logela bateko hamar etxebizitza, bi logelako 55 etxebizitza -horietatik lau mugikortasun urriko pertsonentzat egokituak, eta hiru logelako 16 etxebizitza.

PLAZA

Bi eraikinen artean erabilera publikoko plaza zolatu bat proiektatzen da, eta bertatik sartuko da atarietara; mendebalderantz, berriz, lorategidun ezponda bat antolatuko da, Araxes ibaiarekiko paraleloa den pasealekuarekin modu atseginean lotzeko.

Partzelak %5,5eko malda du, eta horrek eraikuntza soluzio egokitua eskatzen du: iragazkortasun txikiko hormigoizko perimetro hormak, zimendatze mistoak, zapata isolatu eta jarraituekin, eta egitura osatzen duten zutabe eta habedun arkupeak.