Arabako Kroketaren I. Astea hasiko da ostiralean eta 44 establezimenduk parte hartuko dute

GASTEIZ 23 (EUROPA PRESS)

Arabako Kroketaren I. Astea hasiko da ostiralean, otsailaren 27an, ekimenerako berariaz prestatutako kroketa berezia aurkeztuko duten 44 establezimenduetan, eta martxoaren 8ra arte egongo da proposamenak dastatzeko denbora. Finala martxoaren 9an izango da Gasteizen eta hainbat sari banatuko dira.

Ekimen gastronomikoa Harinas Urdanoz www.semanadelacroqueta.es webgunearen sustatzaileak eta Aitor Buendiak zuzentzen duen La Ruta Slow-k antolatu dute, eta SEA Ostalaritza, Gasteizko Udala eta Arabako Foru Aldundia dira babesle nagusiak. Gainera, Bastidako Bodegas Aimarez upategiak, Aceite Urzantek, Chovik eta Kaikuk babestuko dute, eta Nafarroako Ostalaritza Kooperatibak eta Kroketak.eus-ek laguntza eskainiko dute.

Bada, aurkezpenean azaldu dutenez, Arabako Kroketaren I. Astean 44 establezimenduk parte hartuko dute (parte hartzeko ezinbestekoa da barran kroketa eskaintzea), Gasteizko ibilbide eta zonaldeetan eta Arabako beste hainbat tokitan banatuta, hala nola Aiaraldean eta Lautadan, bi ibilbidetan.

Establezimendu bakoitzak bere elaborazioarekin hartuko du parte, eta epaimahai batek baloratuko ditu. Finala martxoaren 9an egingo da Gasteizko Abastos Merkatuko sukalde gelan, eta iritsi diren establezimenduek gastronomiako profesionalek osatutako epaimahai bati aurkeztuko dizkiote beren lanak.

Lehen, bigarren eta hirugarren sariak, sormenaren eta berrikuntzaren saria, kroketa tradizionalaren saria, frijitze puntu onenaren saria, krematsutasun handienaren saria eta uztartze onenaren saria banatuko dira.