BBK-k milioi bat euro bideratuko ditu aurten Bizkaiko lehen sektoreari laguntzeko

BILBO, 28 (EUROPA PRESS)

BBK-k milioi bat euro bideratuko ditu 2023an Bizkaiko baserritarrei laguntzeko, "lurraldearen lehiakortasun iraunkor edo jasangarrian aurrera egiteko sektore estrategiko baten protagonistak baitira".

Erakundearen laguntza bi bide desberdin eta osagarriren bidez gauzatuko da salmentak laguntzeko: batetik, 73 udalerritan egingo diren 103 azokak, eta, bestetik, BBK Azoka e-commerce, Bizkaiko lehen sektorearen erakusleiho digitala, non lurraldeko 58 ekoizlek parte hartzen duten.

Nora Sarasola BBK-ko Gizarte Ekintzako zuzendariak astearte honetan aurkeztu ditu erakundeak Bizkaiko lehen sektoreari laguntzeko dituen ekimenen xehetasunak, Urduñako Santa Klara baserrira egindako bisitan, Mikel Kormenzana baserriaren jabea eta Arantza Meabe Urduñako gozogilea ere bertan zirela.

BBK-k 1977an egin zuen bere lehen sektorearekiko konpromisoa, Bizkaiko nekazaritza eta abeltzaintza azoken antolakuntzan laguntzen hasi zenean, sektorearentzat garrantzi handiko zuzeneko salmenta kanala izaki. Lehenengo urte hartan 12 azoka egin ziren eta 46 urte geroago ehundik gora egiten dira; aurten ere, besteak beste, Abadiño, Bermeo, Muskiz, Gernika, Zamudio eta Bilboko San Tomas azokez gozatu ahal izango dute bizkaitarrek BBKri esker.

Bisitan zehar Sarasolak nabarmendu duenez, "BBK-k Bizkaiko azoketan emandako laguntzarekin elikadura sistema jasangarria bultzatzen dugu ingurumen eta klima inpaktua murrizteko asmoz, elikagaien segurtasuna indartuz, herritarren osasuna babestuz eta inplikatutako eragileen errentagarritasun ekonomikoa bermatuz".

BBKrentzat, lehen sektorea lurraldearen lehiakortasun jasangarrirako sektore estrategikoa da, eta horren eginkizuna indartu egingo da epe ertainera, adibidez, Garapen Jasangarrirako 2030 Agenda eta Europako Itun Berdea moduko ekimenen bidez.

2022an, 170 ekoizle bizkaitarrek parte hartu zuten BBK azoketan (55 emakume eta 115 gizon); horietatik 38k hamar azoka baino gehiagotan errepikatu zuten, eta zortzik 30 baino gehiagotan. Azoka horietan beste lurralde batzuetako 49 ekoizlek ere parte hartu zuten.

Kormenzanak azaldu duenez, "zuzeneko salmenta funtsezkoa da gure ekoizpen eredurako. Azoken eta merkatuen aldeko apustuak gure baserriak eta herrien jarduera mantentzen laguntzen du. Azoketara joatea bere jarduera komertzialaren zati garrantzitsua da oraindik".

ERAKUSLEIHO DIGITALA

Azoketan presentzia handitzeaz gain, 2023an BBK Azoka zuzeneko salmentako sareko plataformaren ikusgarritasuna bultzatzen, baserritar berriak erakartzen eta plataforma logistikoa hobetzen jarraituko du BBK-k.

Gaur egun, plataformak jarduneko ustiategi txiki eta ertainetako 58 ekoizle biltzen ditu. Sasoi edo denboraldiaren arabera txandakatuz, urtean zehar kalitate bikaineko tokiko 500 produktu eskaintzen dituzte, hala nola ortuari edo barazkiak, fruta, eztia, arrain kontserbak, esnekiak, marmeladak, hestebeteak edo txakolina.

2022an BBK Azokak hilean batez beste 60 eskaera kudeatu ditu, 65 euroko tiketarekin, batez beste. Sarasolak adierazi duenez, "erosketa errepikariak egiteaz gain, erosketa saskiari produktu berriak eranstera animatzen den kontsumitzaile komunitatea fidelizatzea lortzen ari gara, eta horrek batez besteko tiket altuagoa eragiten du".

BBK-k eta atxikitako ekoizleek BBK Azokaren jarduera sendotzeko itxaropena azaldu dute: "Nekazaritzako elikagaien sektoreak ez du salmenta kanal digitaletatik aldendu behar, kontsumitzaileen profil berrietara egokitu gura badu, hurbileko produktuak kontsumitu nahi dituztelako eta beraientzat online erosketa aukerarik onena delako".

Ildo horretan, Arantza Meabe Urduñako gozogileak Santa Klara baserriko produktuak erabiltzen ditu bere elaborazioetan, eta, azaldu duenez, "garrantzitsua da kontsumitzaileak erosten duen produktuari aurpegia jartzea, pertsona horren atzean bere lana dagoelako eta nork aholkatuko duen hobeto. Zuzeneko salmentak pertsona eta produktua lotzen laguntzen du".