Bi lagun atxilotu dituzte Bilbon eta beste hiru ikertzen ari dira tren eta metro bagoietan grafitiak egiteagatik

BILBO 13 (EUROPA PRESS)

Ertzaintzak ustez Gudaris (GDRS) izeneko taldeko kidea diren 34 urteko gizon bat eta 29 urteko emakume bat atxilotu ditu Bilbon, tren eta metro bagoietan grafitiekin kalteak egitea leporatuta. Taldeko beste hiru kide ikertzeko eginbideak ere hasi dituzte, egitateetan parte hartzeagatik.

Eusko Jaurlaritzako Segurtasun Sailak jakinarazi duenez, Bizkaiko Ikerketa Kriminaleko Lurralde Zerbitzuak ikerketa bat abiarazi zuen urte hasieran, Ertzaintzan hainbat salaketa jarri zituztenean Metro Bilbaoko eta Euskotreneko bagoietan grafitiekin egindako kalteengatik. Eragindako kalteen zenbateko osoa 21.000 eurotik gorakoa da.

Ikerketaren ondorioz, kalte horiek egin zituzten pertsonak identifikatzea lortu zuten, eta bikotekideak diren 34 urteko gizon bat eta 29 urteko emakume bat atxilotu zituzten astelehenean. Gainera, operatiboan eginbideak hasi dituzte delitu egintza horietan inplikatuta dauden 37, 38 eta 42 urteko hiru gizon ikertzeko.

Kalte delitua, desordena publikoak, lesio larriak eta talde kriminaleko kide izatea leporatu dizkiete guztiei. Atxilotutako gizona Gudaris taldearen (GDRS) burua omen da, eta emakumea eta beste hiru ikertuak taldeko kideak. Taldeak modu egituratu eta jarraituan jardun du Bizkaiko hainbat herritan, hala nola Berango, Bilbao, Gernika, Busturia, Basauri, Urduliz, Etxebarri eta Zaldibarren, bai eta Gipuzkoan ere.

Taldearen helburua grafitiak egitea da, azpiegitura publiko eta pribatuetan kalteak eraginez, bereziki trenbidekoetan. Urte hasieratik gutxienez 11 ekintzatan parte hartu izana leporatu diete. Ikertuetako eta atxilotuetako batzuk 2014tik parte hartu izan dute antzeko ekintzetan, eta bi aldiz ere aurre egin diete segurtasun zaindariei, lesioak eraginez; zehazki, Metro Bilbaoren Urdulizko geltokian joan den apirilaren 14an gertatutako egitateetan, zaindarietako batek lesio larriak jasan zituen. Poliziaren egoitzan beharrezko izapideak amaitu ondoren, agintaritza judizialaren eskuetan jarriko dituzte.