Bizkaiko Foru Aldundiak 360.000 euro bideratuko ditu sei bizikleta-aparkaleku seguru ipintzeko

BILBO, 10 Ene. (EUROPA PRESS) -

Bizkaiko Foru Aldundiak datozen asteotan sinatu nahi dituen sei hitzarmenetatik lehena sinatu du Barakaldon. Hitzarmen hauei esker guztira 360.000 euro erabili nahi dira sei bizikleta-aparkaleku seguru Bizkaian jartzeko.

Garraioak eta Mugikortasun Jasangarria Sustatzeko diputatuak, Miguel Ángel Gómez Viarek, eta Barakaldoko alkateak, Amaia del Campok, sinatu dute lehen hitzarmena, industria-herritik igarotzen den bidegorriaren ondoan, BiziPark bat Barakaldon jartzeko.

Horretarako foru-sailak 60.000 euroko laguntza emango du; hain zuzen ere, gainerako bost ekipamenduak jartzeko emango duen kopuru bera.

Udalek aparkaleku horiek atontzeko eta hornitzeko lanak egingo dituzte, eta gero, hitzarmenaren indarraldian (lau urte), horiek kudeatu eta mantentzeko ardura edukiko dute.

Barakaldoz gain Gueñes, Derio, Zalla, Abadiño eta Bermeon lan berdinak egiteko asmoa dago, behin hurrengo hitzarmenak sinatzea lortzen denean.

Barakaldoko BiziPark bidegorriaren ondoan jarriko da, oinarrizko gizarte-zerbitzuaren D lokaletan, zehazki, udalak berak utzitako Dolores Ibarruri kalean kokatutakoak.

Honek bizikletak aparkatzeko 24 plaza izango ditu, honako baliabide hauekin: sarrera-kontrola eta kudeatzeko softwarea, Interneteko konexioarekin; barrualdea beti argiturik egoteko sistemak; gutxienez suaren aurkako sei armairu, bakoitza bere elektrizitate-hargunearekin, erabiltzaileek beren gauzak seguru edukitzeko; zaintza-sistemak, eta Barakaldoko Udaltzaingoaren segurtasun-zerbitzuekin konektatutako kamerak.

Eguneko 24 orduetan, urteko 365 egunetan funtzionatuko du, eta hauexek izango dira aparkalekua erabiltzeko tarifak: 4 hilabetea; 10 hiruhilekoa; 20 seihilekoa eta 40 euro urte osoa. Hamalau egunik behin erabili beharko da bizikleta, aparkalekua ez dadin bizikletak gordetzeko toki batean bilakatu.