CAF-Elhuyar sariak banatuko dira asteazken honetan Donostian

DONOSTIA 23 Oct. (EUROPA PRESS) -

CAF-Elhuyar sarien 30. edizioaren banaketa ekitaldia egingo da asteazken honetan, urriaren 23an, Donostiako Tabakalerako Kutxa Kultur Plazan, eta Miren Basaras Ibarzabal mikrobiologoak CAF-Elhuyar merezimendu saria jasoko du, "euskarazko dibulgazioan erreferentea delako, mikrobiologiaren eremuan bereziki". Gainerako saridunak ekitaldian bertan ezagutaraziko dira, 18:00etan hasita.

Elhuyarreko iturriek jakinarazi dutenez, CAF-Elhuyar sarien helburua kultura zientifikoa sustatzea da, eta horretarako, gai zientifiko eta teknologikoak gizarteratzen dituzten dibulgatzaile, ikertzaile eta sortzaileen lana aitortzen du.

Bada, aurtengo sarituen artean izango da Miren Basaras Ibarzabal mikrobiologoa, CAF-Elhuyar merezimendu saria jasoko baitu, "euskarazko dibulgazioan erreferentea delako, mikrobiologiaren eremuan bereziki".

Miren Basaras Ibarzabal (Derio, Bizkaia, 1968) mikrobiologoa eta Euskal Herriko Unibertsitateko (EHU) irakaslea da. Biologian lizentziatu zen EHUn, eta 1995ean doktoratu zen, 'RNAren detekzioa VHC bidezko infekzioan. Inplikazioa hepatitis kronikoen terapeutikan' tesiarekin. Mikrobiologiako irakasle titularra da eta Medikuntzako Graduan irakasten du, bai eta Mikrobiologia eta Osasuna Masterrean eta Mikrobiologiako doktore programan ere.

Horrez gain, Dibulgazio artikulua eta Doktore tesiaren artikulua kategorietako sariak ere banatuko dira. Zientzia eta teknologiaren arloan euskaraz sortutako dibulgazio lanak saritzen dira, eta irabazleek 2.000na euro eta Imanol Andonegi Mendizabalen eskultura bana eskuratuko dituzte.

Neiker saria lehen sektoreko lan onenak jasoko du, eta irabazleak 2.000 euro eta Imanol Andonegi Mendizabalen eskultura jasoko ditu. Zientzia kazetaritza kategorian, berriz, euskaraz sortu eta 2023an argitaratutako kazetaritza lan bat sarituko da (2.000 euro eta Andonegiren eskultura).

Azkenik, Sorkuntza beka kategorian, zientziaren/teknologiaren eta gizartearen arteko elkarrekintza lantzen duten proiektuak bultzatzen dira, eta hautatutako proiektuak 5.000 euroko beka bat jasoko du, proiektua garatzen eta gizartera zabaltzen laguntzeko.