Donostiako Orfeoia Zaldibarren izango da larunbatean, Bitor Garitaonaindiaren jaiotzaren 150. urtemuga dela eta

DONOSTIA 11 (EUROPA PRESS)

Donostiako Orfeoiak kontzertua eskainiko du larunbatean, martxoaren 14an, Zaldibarko (Bizkaia) frontoian, eta nazioarteko errepertorio korala, euskal musikako obra enblematikoak eta herri tradizio handiko konposizioak interpretatuko ditu. Saioa Bitor Garitaonandia idazle, musikari eta euskaltzalearen jaiotzaren 150. urteurrenaren ospakizunen baitan dago, eta Donostiako abesbatzaren "sonoritatea eta moldakortasuna lurraldeko publiko ezberdinei hurbiltzeko beste aukera bat izango da, kasu honetan, Bizkaiko publikoari", taldeko iturriek jakinarazi dutenez.

Bada, abesbatzaren estilo aniztasuna agerian uzten duen hautaketa anitza eskainiko du programak. Hainbat egileren 'medleybat' eskainiko du orfeoiak, bai eta aurkezpenik behar ez duten obrak ere, hala nola 'Amazing Grace' (John Newton), ' Edelweiss' (R. Rodgers eta O. Hammerstein), 'Hallelujah' (Leonard Cohen), 'Moon River' (Henry Mancini), 'Imagine' (John Lennon) eta 'Puente sobre aguas turbulentas' (Simon & Garfunkel).

Gainera, euskal tradizioarekin eta musika-sentikortasunarekin lotutako abestiak ere entzun ahal izango ditu publikoak, besteak beste, 'Maite' (Pablo Sorozabal), 'Baldorba' (Benito Lertxundi), 'Txoria txori' (J. A. Arze / Mikel Laboa, J. Ituartek moldatua), ' Lau teilatu' (Juan Carlos Perez), 'Aurtxoa seaskan' (Gabriel Olaizola), 'Xalbadorren heriotzean' (Xabier Lete) eta 'Jaialdia' (Iñaki Urkizu).

Kontzertua 19:30ean hasioko da eta Nerea Alberdik, Lucia Garciak eta Uxue Eceizak parte hartuko dute, bai eta Borja Rubiños piano jotzaileak ere. Jose Antonio Sainz Alfaro arduratuko da musika zuzendaritzaz, "zehaztasun teknikoa, adierazkortasuna eta publikoarekiko hurbiltasuna bateratzen saiatuko den egitarau batean".