EAEko txikizkako merkataritzaren salmentak %3,3 gehitu dira urteko lehenengo hiruhilekoan

BILBO 8 (EUROPA PRESS)

Euskal Autonomia Erkidegoko (EAE) txikizkako merkataritzaren salmentak %3,3 gehitu dira 2026ko lehenengo hiruhilekoan, joan den urteko hiruhileko beraren aldean, prezio konstanteetan eta egutegiaren eraginak zuzendu ondoren. Aurreko hiruhilekoarekin alderatuta, berriz, prezio konstanteetako salmentak %0,4 hazi dira, dagozkien urtaro eraginak kenduta, Eustat euskal estatistika erakundearen datuen arabera.

Salmenten urte arteko bilakaera positiboa izan da elikaduran, gainerako produktuetan eta automoziorako erregaian, %1,9ko, %3,7ko eta %9,5eko igoerekin, hurrenez hurren, iazko lehenengo hiruhilekoarekin alderatuta. Hiruhileko arteko datuei dagokienez, joera goranzkoa izan da elikagaiak sektorean, %0,1eko igoerarekin, eta gainerako produktuak sektorean, %0,2koarekin; automoziorako erregaia sektorean, aldiz, salmentak %0,4 gutxitu dira.

Elikaduraren sektorearen baitan, salmentak %3,3 txikitu dira elikaduran, edarietan eta tabakoan espezializatutako merkataritzan (fruta dendak, harategiak, arrandegiak eta abar), 2025eko lehenengo hiruhilekoaren aldean. Elikagaiak, edariak eta tabakoa nagusi diren merkataritza ez-espezializatuan (batez ere supermerkatuak eta hipermerkatuak), ostera, salmentak %3,6 hazi dira.

Gainerako produktuen salmentei dagokienez, pertsonen ekipamenduan espezializatutako sektorean (arropa, oinetakoak, produktu kosmetikoak edo higienekoak), salmentak %6,2 hobetu dira, eta kontsumoko beste ondasunetan espezializatutako sektorean %8,8 (kirol gaiak, jokoak edo jostailuak).

Aitzitik, etxeko ekipamenduan espezializatutako sektorean (etxetresna elektrikoak, altzariak eta telekomunikazio ekipoak barne), salmentak %2,5 jaitsi dira, eta gainerako produktuak nagusi diren establezimendu ez-espezializatuetan %1,5 (korrespondentzia edo Internet).

Lurralde historikoei dagokienez, 2026ko lehenengo hiruhilekoko txikizkako merkataritzaren salmente indizeak urte arteko igoera izan du hiruretan: Araban %4,7 igo da, Gipuzkoan %3,9 eta Bizkaian %2,6. Aurreko hiruhilekoaren aldean ere, salmenten bilakaera positiboa izan da hiru lurraldeetan, eta Araban %0,1, Bizkaian %0,2 eta Gipuzkoan %0,8 igo dira.

Azkenik, EAEko txikizkako merkataritzaren sektorean landunen kopuruak %0,5 egin du gora 2026ko lehenengo hiruhilekoan aurreko urteko hiruhileko beraren aldean; 2025eko laugarren hiruhilekoaren aldean, ordea, enplegua %0,2 jaitsi da.