Etxepare Euskal Institutuak munduko 17 hiritan sustatu ditu Korrikaren aldeko ekintzak

BILBO 16 (EUROPA PRESS)

Etxepare Euskal Institutuak bat egingo du 'Euskara gara' lelopean egingo den 24. Korrikarekin, Euskal Herritik kanpo euskarari babesa eta zabalkundea emateko, eta mundu osoko euskal etxeetako kideek eta unibertsitatetako euskara eta euskal kultura irakurletzen irakasleek askotariko jarduerak antolatu dituzte egunotarako. Orotara, Etxepare Institutuak sustatutako ekimen ugari egingo dira munduko 17 hiritan, Korrikaren nazioarteko testuinguruan.

Etxepare Euskal Institututik gogorarazi dutenez, martxoaren 19tik 29ra egingo da 24. Korrika, eta 11 egunotan, 2.175 kilometro burutuko dituzte Euskal Herri osoan barrena, Atharratze (Zuberoa) abiapuntu eta Bilbo helmuga hartuta.

Bada, Etxepare Euskal Institutuaren lankidetzarekin, munduko 17 hiritan egingo da euskararen aldeko lasterketa erraldoiarekin lotura duen ekimenen bat: Europan, zortzi hiritan (Alemanian, Espainian, Frantzian, Italian, Polonian); Hego eta Ipar Amerikan, zortzi hiritan (AEB, Kolonbia, Mexiko, Peru, Txile); Ozeanian Sidneyn antolatu dituzte ekintzak bertako Euskal Etxeek eta unibertsitatetako irakurletzek.

Alde batetik, euskara eta euskal kultura irakurletzek antolatu dituzte ekintza hauek. Etxepare Euskal Institutuak mundu osoko unibertsitateekin lankidetza hitzarmenak sinatzen ditu euskal ikasketak eskaini ditzaten. Euskara eta euskal kulturarekin loturiko ikasgaiak ematen dituzte Etxepare Institutuak sustatutako irakurletzek munduko hainbat unibertsitatetan. Programa ezberdinen bidez irakurleen prestakuntza eta ikasleen euskara gaitasuna sustatzen du Etxeparek.

Bestetik, munduan zehar daude hainbat euskal etxek ere antolatu dituzte ekintzak. Etxepare Euskal Institutuak harreman estua du munduko hainbat euskal etxeekin, haietan euskara irakatsi dadin sustatzen baitu, bai 'Euskara Munduan' programaren bidez, bai eta material didaktikoa bidaliz ere.

"Munduko hiri askotan, bertako irakurletzetako ikasle eta irakasleek eta euskal etxeko kideek elkarlanean antolatu dituzte Korrikaren aldeko ekintzak, nazioarteko euskal komunitatearen batasunaren adierazle", nabarmendu dute Etxepare Euskal Institututik.

Azkenik, nazioartean Korrikak sustatzeaz gain, Etxepare Institutuak bideo lehiaketa antolatu du euskal etxeetako eta irakurletza sareko ikasleen artean AEK-rekin lankidetzan, eta 'Etxepare' gunea babestuko du Bilboko Plaza Barrian, martxoaren 29an, egitasmoaren azken egunean.