Flamenco BBK 17. zikloa hasiko da ostiralean 'The Game' ikuskizunarekin

BILBO, 28 (EUROPA PRESS)

Bilboko BBK Salak flamenko proposamen "anitzenak" bilduko ditu aurten ere Flamenco BBK zikloaren 17. edizioan, eta lehenengo emanaldia ostiralean izango da, martxoaren 31n, 'The Game' izeneko ikuskizunarekin.

Antolatzaileek jakinarazi dutenez, interpreteen kalitatearen eta aniztasunaren alde egiten duen apustuan, zikloak lau ikuskizun izango ditu, jada finkaturiko artistak, hazten ari direnak eta oraindik ezagutzeke dauden gazteak protagonista direla.

Horrela, Jesus Carmona dantzaria, Jose Valencia kantaria eta Juan Requena gitarra jotzailea biltzen dituen 'The Game' ikuskizunak hasiko du zikloa ostiralean. Tradizioaren errespetutik, "obra apurtzaile bat aurkeztuko dute flamenko ikuskizunaren egitura klasikoarekin".

Kantu flamenkoa izango da protagonista hurrengo hitzorduan, apirilaren 28an, 'Cantaoras' emanaldian. Belaunaldi ezberdinetako baina transmititzeko jarrera komuna duten bi emakumezo ahotsen arteko topaketa bat da. Montse Cortesek eta Lela Sotok Joni Jimenezen gitarra, El Orucoren dantza eta Bandoleroren perkusioa izango dituzte lagun.

Maiatzaren 19an, Flamenco BBKren bigarren ekoizpen propioa taularatuko da: 'Savia nueva'. Dantzaren talentu berriak eman nahi ditu ezagutzera, eta, oraingoan, 20 urtetik beherako Claudia La Debla, Yoel Vargas eta Paula Carmona tablao formatutik abiatuko dira indar, aldakortasun eta flamenkoarekiko grinaz beteriko proposamen berritu bat egiteko.

Zikloa ekainaren 9an amaituko da, Florencia O'Ryan flamenko dantzari txiletarraren 'Festejos' muntaiaren emanaldiarekin. Rafael Ramirezek eta Marta Galvezek lagunduta, aniztasun sortzaileari buruzko hausnarketa koreografikoa egingo du, bolero eskolatik garaikidera artean dabiltzan kontzeptuekin.

Ikuskizun guztiak 20:00etan hasiko dira. BBK Salako leihatilan, Kutxabank kutxazainetan edo www.salabbk.es webgunea eros daitezke sarrerak, %15eko deskontuarekin Kutxabank txartelak erabilita.