Gasteiztarren partaidetzarako 'Hobetuz' programaren bosgarren edizioa bozketa fasean sartu da

GASTEIZ 2 (EUROPA PRESS)

'Vitoria-Gasteiz Hobetuz' herritarren partaidetzarako programaren bosgarren edizioa bozketa fasean sartu da martxoaren 22ra bitarte, eta parte hartu nahi dutenek Gasteizko Udaleko teknikariek bideragarritzat jotako 135 proiektuetatik hiruren aldeko boza eman beharko dute. Boto gehien jaso dituzten proposamenak egikaritzeko hiru milioi euroko kontu saila izango da 2026ko eta 2027ko udal aurrekontuetatik.

Miren Fernandez de Landa Gobernu Irekiaren eta Gizarte Etxeen zinegotziak bozketa fasearen xehetasunak azaldu ditu astelehen honetan, Loma Jenerala plazan dagoen 'Hobetuz Kalean' standaren ondoan. Iragarri duenez, Gasteizen erroldatuta dauden 16 urtetik gorako pertsona guztiek bozka dezakete.

Fernandez de Landak herritarrak animatu ditu proposamenak udal webgunean ezagutzera, baita gizarte etxeetan eta beste udal gune batzuetan (BIZAN eta Andre Maria Zuriaren ondoko etxola) banatzen ari diren liburuxken bidez ere. "Inoiz baino proposamen gehiago ditugu aukeratzeko, eta proiektu benetan erakargarriak dira. Zailena hiru bakarrik aukeratzea izango da", gaineratu du.

Zinegotziak eskerrak eman dizkie "banaka edo taldean guztion bizi kalitatea hobetzeko proposamenak egiten denbora eman duten pertsonei". "Horrela eraiki behar da gure udalerria, bertan bizi garenon lankidetzarekin eta inplikazioarekin. Zenbat eta pertsona gehiagok bozkatu, orduan eta interesgarriagoak izango dira errealitate bihurtuko diren eta interes orokorra jasoko duten proiektuak", azaldu du.

Edizio honetan, ekimenak markak hautsi ditu jasotako proiektuen (460) zein proiektu bideragarrien (135) kopuruei dagokienez. Proposamen batzuek %10eko haztapen gehigarria izango dute irizpide hauetako bat edo batzuk betetzeagatik: belaunaldien arteko bizikidetza, genero berdintasuna, kultur aniztasuna edo dibertsitate funtzionala, kalteberatasun egoeran dauden kolektiboen gizarteratzea, jasangarritasuna eta ingurumenaren babesa, arrakala digitalaren murrizketa, proposamen berritzailea edo hiri eremuko proposamena.

Proposamen bakoitza egikaritzeko 350.000 euro izango dira gehienez, orain arte baino 50.000 euro gehiago. Era berean, aurrekontu osoaren %30 programa sozial, komunitario edo kulturaletarako gordeko da (lehen %20 zen), bai eta udal kudeaketako eraikin edo espazioetan inbertsioak egiteko ere. Gehienez ere, bide publikoarekin lotutako bi proiektu gauzatu ahal izango dira auzo edo landa eremu bakoitzeko.

Lomaren Jenerala plazako 'Hobetuz Kalean' standa martxoaren 22ra arte egongo da zabalik, ordutegi hauetan: astelehenetik ostiralera 11:30-13:30 eta 18:00-20:00, larunbatetan 11:30-14:30 eta 17:00-20:00, eta igandeetan eta martxoaren 19an 11:30-14:30.

BOZKATZEKO AUKERAK

Bozkatzeko aukerak askotarikoak dira. Horrela, aurrez aurre bozka daiteke gizarte etxeetan (informazio bulegoetan aldez aurreko hitzordurik gabe, herritarrei arreta emateko bulegoetan, aldez aurretik hitzordua eskatuta, eta autotramitazio makinetan), San Martingo bulego teknikoetan, San Antonio kaleko herritarren arretarako bulegoan, BIZAN zentroetan eta 'Hobetuz Kalean' etxolan. Kasu guztietan baliozko identifikazio .

Era berean, sarean bozka daiteke, Gasteizko Udalaren webgunean, baina herritarren udal txartela (HUT), BakQ edo beste ziurtagiri digital bat izan behar da aktibatuta. Gainera, Bak edo BakQ identifikazioak erabilita, 010 edo 945 16 11 00 telefono zenbakietara deituta ere bhozka daiteke.

Laguntza behar edo kontsultaren bat egin nahi izanez gero, gasteizhobetuz@vitoria-gasteiz.org helbide elektronikora idatz edo 945 16 16 87 Partaidetzarako Udal Zerbitzuaren telefono zenbakira dei daiteke.

'Vitoria-Gasteiz Hobetuz' egitasmoaren bosgarren edizioan bideragarritzat jotako 135 ekimenak zenbait esparruren arabera sailkatu dira: Vitoria-Gasteiz Green (30 proposamen), aisialdirako eta topaketarako espazioak (38), udalerria hobetzea (55) eta bizikidetza, kultura, berdintasuna eta aniztasuna (12). Proiektu bideragarrien zerrenda osoa www.vitoria-gasteiz.org/vghobetuz web orrian eta Herritarren Partaidetzarako Udal Zerbitzuak banatu duen argitalpenean kontsulta daiteke.

Martxoaren 22an botoa emateko epea amaitzen denean, Gasteizko Udalak aurrera eramango dituen proposamenen zerrenda prestatuko da, jasotako boto kopuruaren arabera eta hiru milioi euroko zenbatekora arte. Emaitza martxoaren 25ean eagutaraziko da Europa Jauregian egingo den jaian (herritarrentzat irekita egongo da), eta zerrenda hurrengo egunean argitaratuko da udal webgunean.