Gizon bat atxilotu dute Bilbon beste bati sexu erasoa egiteagatik

BILBO 30 (EUROPA PRESS)

Ertzaintzak 43 urteko gizonezko bat atxilotu zuen ostegunean Bilbon sexu askatasunaren aurkako delitua leporatuta, beste gizonezko bati labana batekin beldurtu, itotzen saiatu eta sexu erasoa egiteagatik Barakaldoko (Bizkaia) eraikin abandonatu batean.

Eusko Jaurlaritzako Segurtasun Sailak jakinarazi duenez, erasoa joan den asteazken arratsaldean gertatu zen Barakaldoko Lutxana auzoko eraikin abandonatu batean, biktima eta erasotzailea gaua pasatzera joan zirenean.

Atxilotu duten gizona hasiera batean sexu harremanak izaten saiatu zen 21 urteko beste gizonarekin, baina honek ezetz esan zion. Biak borrokan hasi zirenean, erasotzaileak biktima buruan jo zuen, itotzen saiatu zen eta, azkenean, labana lepoan jarrita mehatxatu zuen eta sexu erasoa burutu zuen.

Indarkeriazko gertaera horren ondoren, erasotzaileak galarazi egin zion bertatik alde egitea biktimari, hurrengo goizera arte, eta azkenean, ostegun arratsaldean salatu ahal izan zuen erasoa.

Gertatutakoaren berri izan bezain laster, Bilboko ertzain-etxeko agenteek zegokion ikerketa hasi zuten ustezko erasotzailea identifikatu eta aurkitzeko, eta Bilbo Zaharrean atxilotu zuten. Atxilotuak polizia aurrekariak ditu antzeko delituengatik, eta ostiral honetan jarri dute epailearen eskuetan.