Actualizado 27/09/2021 13:58 CET

Itziar Ituñoren ibilbidea aitortuko du Santurzine jaialdiak, Serantes saria emanez

Archivo - Itziar Ituño
NETFLIX - Archivo

BILBO, 27 (EUROPA PRESS)

Itziar Ituño aktore eta abeslariak jasoko du aurten Santurzine Santurtziko Jaialdiko Serantes saria. Urriaren 1etik 16ra ospatuko da jaialdia Bizkaiko udalerrian. Zineman lanean diharduen pertsona edo erakunde baten ibilbide profesionalari egiten zaio aitortza sariarekin, eta aurten Basauriko aktore ezagunari emango zaio jaialdiaren bederatzigarren edizioaren itxiera galan, urriaren 16an, Serantes Kultur Aretoan.

Horrela, Ituño hirugarrenez izango da Bizkako udalerriko jaialdira, laugarren edizioan Santurtzi atalean (SZ4) parte hartzeaz gain, epaimahai ere aritu zelako bosgarren aldian, antolakuntzak jakinarazi duenez.

Santurzine jaialdiak Ituñoren ibilbide luzea nabarmendu du. Gaur egun, "aktore ospetsu eta guztiz maitatua da, bai Euskal Herrian eta bai mundu osoan", telebistako bi telesaiori esker: 'Goenkale' (300dik gora atal grabatu zituen) eta 'La casa de papel' (egun azken denboraldia ikus daiteke).

Gainera, euskarazko zinemarekin duen "lotura estua" azpimarratu du, "babes eta laguntza handia eman dio eta". Horrela, euskal zinean azken urteotan ikusi ditugun zenbait filmetan hartu du parte, hala nola 'Loreak' (Jon Garaño, Jose Mari Goenaga, 2014), 'Errementari' (Paul Urkijo, 2017), 'Hil kanpaiak' (Imanol Rayo, 2020) edo 'Ilargi guztiak' (Igor Legarreta, 2021) filmetan.

Bestalde, antzerkian eta musikan ere aritua dela gogorarazi du, 20 antzezlan baino gehiago egiteaz gain, Ingot musika taldearen kantaria baita. Ekintzaile ere badela nabarmendu du, "Amazonas aldean ibili baita kooperante eta bertan antzerki tailerrak egin ditu".

Hori guztia tarteko, Santurzine jaialdiko bederatzigarren edizioko antolakuntza taldeak aitortza egin nahi izan dio "emakume ausart, enpatiko eta solidario honi, euskal zinema eta euskara mundu osoan zabaldu duenari".

EGITARAUA

Santurzine ostiralean hasiko da, urriaren 1ean. Mugek eta pandemiak markatutako urte luzearen ostean, aurten herriko ostalaritza lokaletan eskaintzen ziren emanaldiak berreskuratuko ditu urriaren 1ean, 8an eta 15ean).

Gainera, bi emanaldi berezi izango dira lehen aldiz Santurtzitik kanpo: urriaren 2an Galdamesen egingo da lehenengoa, Montellano auzoko izen bereko tabernan, eta bigarrena Bilboko Uribarri auzoan, hilaren 7an, Euskal Herrian ekoitzitako film laburrak eskainiko dituen SZ Off atalarekin.

Saio hauekin batera bi film luze emango dira Serantes Kultur Aretoan. Ohi bezala, jaialdia Santurtziko zine klubarekin arituko da lankidetzan, eta ildo horretan, zine klubaren aurtengo denboraldiaren hasieran, ostegunean, irailaren 30ean, David Ilundain zinemagile nafarraren 'Uno para todos' filmaren emanaldian hartuko du parte, eta urriaren 14an Wong Kar Wai zinemagile asiarraren unibertsoa ekarriko du, 1994an egin zuen 'Chungking Express' filma eskainiz.

Halaber, bigarren urtez jarraian Santurtzi Zine Lantegia egingo da. Zinearen euskal industriari zuzendutako bi saio izango ditu. Lehenengoa urriaren 2an da Casa Torre jauregian, non sortzaileen foro bat osatuko den. Parte hartzaileek ekoitzi aurreko fasean dauden egitasmoak aurkeztuko dituzte eta epaimahaiak 500 euroko saria emango dizkio hoberen irizten dioten proiektuari. Bigarren urriaren 9an izango da, eta Itziar Lazkano aktoreak interpretazio eskola berezia eskainiko du Kresala aretoan.

FILMAK

Guztira 847 produkzio jaso dira jaialdiaren lau sail nagusietarako, aurreko edizioan baino 350 gehiago, errekorra lortuz. Bestalde, Santurtzi atalean 12 lagunek eman dute izena.

Estatuko atalari dagokionez, hamar film jaso dira, haietako askoren egileak ezagunak jaialdian, hala nola Juanjo Giménez (lehiaketarako 'Ascenso' filma aurkeztu du) eta César Tormo ('Purasangre') zuzendariak, edota Miki Esparbé, Josean Bengoetxea, Carlos Librado 'Nene' eta Victor Palmero.

Ibiltariak atalak, Amnesty International elkartearekin lankidetzan, ingurumena babesteagatik hiltzeko arriskuan dauden aktibistak izango ditu ardatz, eta Luz Estrella Romero abokatu kolonbiarraren testigantza entzungo da bertan, Bilbon baitago errefuxiatu. Ibiltariak atala Deustuko Unibertsitateko geletan egingo da, Bilbon eta Donostian, eta urriaren 10ean ekitaldi berezia izango da Santurtzin kontzertu batekin.

Euskal Pantailak atalak Euskal Herriko hamar proposamen ekarriko ditu, "freskoak eta elkarrengandik ezberdinak", eta Kalean atalak etxegabeek bidean topatzen dituzten oztopo eta arazoak erakutsiko ditu Bizitegi elkartearen eskutik.

Jaialdiaren atal nagusiak baloratzeko epaimahaikide izango dira David Pérez zuzendari eta gidoigilea, Lander Otaola aktore eta idazlea, Aitziber Garmendia aktore eta umoregilea, Koldo Zuazua ekoizlea eta Tânia da Fonseca argazki zuzendaria.