Jaurlaritzak 10,4 millioi euro bideratuko ditu kulturaren ekoizpen eta sustapenera hiru diru laguntza deialdiren bidez

GASTEIZ 21 (EUROPA PRESS)

Eusko Jaurlaritzako gobernu kontseiluak kultura ekoizteko eta sustatzeko hiru diru laguntza deialdi onartu ditu astearte honetako bileran, eta, denera, 10.438.000 euro bideratuko ditu.

Zehazkiago, Jaurlaritzatik jakinarazi dutenez, ikus-entzunezko ekoizpenerako deialdiak 8.828.000 euroko kontu saila izango du, arte eszenikoak sustatzeko programen deialdiak 850.000 eurokoa, eta literatura argitalpenen ekoizpenerako deialdiak 760.000 eurokoa.

Ikus-entzunezkoen ekoizpena sustatzeko deialdiari dagokionez, 5.400.000 euro bideratuko dira zinemarako fikziozko film luzeak, zinemarako animaziozko film luzeak eta sortze dokumentaleko film luzeak finantzatzera. Era berean, 428.000 euro banatuko dira film laburren produkziorako laguntzetan, eta 3.000.000 euro euskarazko serieak ekoizteko laguntzetan.

Eskabideak aurkezteko epea hilabetekoa izango da deialdia Euskal Herriko Agintaritzaren Aldizkarian (EHAA) argitaratu eta hurrengo egunetik hasita.

Bestalde, arte eszenikoak sustatzeko programari dagokionez, 160.000 euro bideratuko dira arte eszenikoetako profesionalen etengabeko prestakuntzara, 160.000 euro arte eszenikoak sustatzeko egitasmoetara, 265.000 euro kaleko arte eszenikoak erakusteko programak garatzera eta 260.000 euro Sarea dantza zirkuitua garatzera. Eskabideak aurkezteko epea hilabetekoa izango da deialdia EHAAn agertu eta hurrengo egunetik aurrera.

Azkenik, literatura argitalpenen ekoizpena sustatzeko deialdian, euskarazko literatura argitalpenak diruz laguntzeko 575.000 euro erabiliko dira, gaztelaniazko literatura argitalpenak laguntzeko 125.000 euro, eta euskarazko literaturako audio-liburuen argitalpenak laguntzeko 60.000 euro. Eskaerak aurkezteko epea hilabetekoa izango da astearte honetan onartutako agindua EHAAn argitaratu eta hurrengo egunetik aurrera.