Leioako V. Emakumeen Martxa egingo da martxoaren 10ean

LEIOAKO UDALA

BILBO 5 Feb. (EUROPA PRESS) -

Leioako Udalak (Bizkaia) V. Emakumeen Martxa antolatu du martxoaren 10ean, M8ko Emakumearen Nazioarteko Eguna ospatzeko diseinatutako egitarauaren baitan, emakumeek gizartean parte hartzeko eta pertsona gisa gizonarekiko berdintasunean garatzeko egiten duten borroka eta aldarrikapena ikusarazteko asmoz.

Leioako Udaletik jakitera eman dutenez, martxa 11:00etan abiatuko da Errekalde plazatik, eta herrian zehar hiru kilometroko ibilbidea egin ondoren amaituko da. Parte hartzeko beharrezkoa da aldez aurretik izena ematea, udaleko eta Gaztelubideko herritarrentzako arreta zerbitzuetan edo Kultur Leioan, eta epea otsailaren 23ra arte dago zabalik.

Aurtengo ediziorako, ohikoa den bezala, izena emango duten pertsonek doan jaso ahal izango dituzte Leioako Udalak diseinatutako kamisetak, martxoaren 6, 7 eta 8an, 10:00etatik 13:00etara eta 17:00etatik 20:00etara, Kultur Leioan.

Gainera, M8ko programazioan, Leioako Udalak hiru prestakuntza saio antolatu ditu, tea parte hartzeko aldez aurretik ere izena eman behar da. Hitzaldiak hainbat eremurekin lotuta daude, betiere ikuspegi feminista batetik.

Horrela, lehenengo bi hitzaldiak Leioako Emakumeen Jabekuntza Eskolan izango dira: 'Pornoa deseraikitzen' (martxoak 6) eta 'Desmadrad@s, la maternidad desde el feminismo' (martxoak 11). Izen-ematea laket@leioa.eus helbidera mezu elektroniko bat bidalita egin behar da. Haurtzaindegi zerbitzua egongo da, aldez aurretik eskatuta.

'Nola prebenitu eta antzeman indarkeria matxista adin gazteenetatik' hirugarren hitzaldia martxoaren 13an izango da, Kultur Leioako prentsa aretoan izango da, eta bertaratzeko ez da beharrezkoa aldez aurretik izena ematea, baina bai haurtzaindegi zerbitzua izateko, berdintasuna@leioa.eus helbidera mezu elektroniko bat bidaliz.