"Naturaren argazkilariak 2010" erakusketa ireki dute Bilboko Ondare aretoan

BILBO 2 Dic. (EUROPA PRESS) -

Bizkaiko Foru Aldundiko Kultura Sailak "Naturaren argazkilariak 2010" deritzon erakusketa eraman du Bilbora, Ondare aretora, hain zuzen ere. Urtarrilaren 15era arte ikus daiteke astelehenetik ostiralera, 10:00etatik 13:00etara eta 17:00etatik 21:00etara, eta larunbatetan, 10:00etatik 14:00etara.

Foru erakundetik adierazi dutenez, 2009. urteko "Wildlife Photographer of the Year" Veolia Environnement izeneko lehiaketako epaimahaiak eman dituen sariak ordezkatzen dituzten 94 argazkik osatzen dute bilduma ibiltaria. Nazioarteko epaimahai batek 94 herrialdetako argazkilariek aurkeztutako 43.135 argazkien artean 80 argazkilari profesional eta afizionaturen lanak aukeratu zituen eta 94 argazki horien bilduma ibiltaria egin da orain.

Balio artistikoari begiratu zaio irudiak aukeratzeko orduan eta hainbat subjektu eta estilo ezberdin batu dira: erretratuak, lur birjinaletako aparteko irudiak, animalien jokabidearen argazki ikusgarriak eta ingurumeneko erreportajeak. Bilduma honi esker, aukera dago lurreko bizitzaren bikaintasun, dramatismo eta aniztasunaz gozatzeko.

Erakusketa hainbat ataletan dago banatuta: forma eta antolaketa, ugaztunak, hegaztiak, beste animalia batzuk, natura zuri beltzean, natura hiri eta lorategietan, landaren laudorio, animalien erretratuak, lur birjinalak, animaliak euren ingurunean, urpeko mundua, Lur Planeta Saria, Gerald Durrel Saria eta "Young Wildlife Photographer of the Year" Veolia Environnement Saria.

BBC Wildlife Magazine eta Londreseko Natural History Museum erakundeek sustatutako sari honetarako deialdia urte bakoitzeko udaberriaren hasieran egiten da eta irekita dago parte hartu nahi duten guztientzat.