Sindikatuek bost greba egun deitu dituzte Osakidetzan kolektibo guztien lan baldintzen hobekuntza eskatzeko

BILBO 10 (EUROPA PRESS)

Satse, ELA, LAB, CCOO eta UGT sindikatuek bost greba egun deitu dituzte Osakidetzan kolektibo guztien lan baldintzen hobekuntza eskatzeko helburuarekin, joan den uztaila bukaeran udazkenera begira iragarritako greba eta mobilizazio dinamikaren baitan.

Sindikatuotako ordezkariek ostegun honetan Bilbon egindako agerraldian iragarri dutenez, mobilizazio egutegia adostu dute eta datorren urriaren 30ean greba deituko dute Osakidetza osoan. Era berean, abenduan beste lau greba egun deituko dituzte: abenduaren 9an Araba, 10ean Bizkai, 11n Gipuzkoan eta berriro ere Osakidetza osoan. Egutegiak lantokietako kontzentrazioak ere barne hartzen ditu.

Sindikatuek Osakidetzari eskatu diote "benetako edukiak" jorratu ditzala Mahai Sektorialean, eta "proposamen zehatzak eta sakonekoak" egin ditzala osasun publikoan lan egiten duten kolektibo guztien lan baldintzak hobetzeko.

Deialdia egin duten sindikatuek Osasun Sailari ohartarazi diote ez dutela "simulazio hutsik" sustatuko, "hileroko bilerak deitze hutsak ez dakarrelako benetako negoziaziorik", eta, beraz, "benetako edukiak dituzten proposamenak" eskatu dituzte.

Sindikatuek salatu dutenez, Osakidetzak "kontrako itxura eman nahi izan badu ere, gaur egun ez dago mahai gainean inolako proposamenik lan baldintzen akordioa eguneratzeko eta langileen ordainsariak hobetzeko".

Satsek, ELAk, LABek, CCOOk eta UGTk eskatu dute, edozein bilera egin aurretik, proposamenak idatziz bidaltzeko "behar besteko aurrerapenarekin", sindikatu bakoitzak behar bezala aztertu ahal izan izateko, "ekarpenak eta negoziazio-gai berriak egin eta proposatzeko aukera edukitzeko".

Sindikatuen arabera, uztaila bukaeran Jaurlaritzak SMErekin sinatutako akordioak "bi gauza uzten ditu agerian: lan baldintzak hobetzea borondate politiko kontua dela, eta Eusko Jaurlaritzak ez duela kolektibo guztien egoera hobetzeko borondaterik". "Horrek mobilizatzera eta gure eskubideak kalean exijitzera bultzatzen gaitu", gaineratu dute.

Deialdia egin duten sindikatuek uztailean nabarmendu zuten Osakidetzaren etorkizuna ezin dela eraiki erantzun partzialen bidez, ezta plantillaren zati bati soilik eragiten dioten akordioen bidez ere, kontuan hartuta, gainera, horiek ez dietela heltzen osasun publikoaren egiturazko arazoei.

Gogoratu dute SMErekin sinatutako akordioak "aparteko orduetan oinarritutako eredu batean" sakontzen duela. "Sistema hori, 25 urtez indarrean egon ondoren, agortuta dago, eta, gainera, egungo egoeraren erantzuleetako bat da", ziurtatu dute.

ESKAERAK

Horrela, Satse, ELA, LAB, CCOO eta UGT sindikatuek aldarrikapen plataforma bat adostu dute. Eskaera nagusietako bat da hitzarmena "berehala" negoziatzea, 18 urte baino gehiago igaro ondoren osorik eguneratzeko, zenbait gai barneratuz, hala nola kolektibo guztien ordainsariak eguneratzea, soldata hobetuta, galdutako erosteko ahalmena berreskuratzera bideratuta, eta lanaldi arrunta murriztea, "urteko ordu kopurua edota asteko 35 orduak hobetzeko unea" delako.

Era berean, sindikatuen iritziz, hitzarmen berriak bildu beharko lituzke lizentzia eta baimenetan benetako aurrerapausoak ematea, eta profesionalen arteko desberdintasunak ezabatzea eta irizpide bateratuak aplikatzea Osakidetzako ESIetan.

Gainera, beste eskaera bat da behin-behinean SMErekin sinatutako akordioan jasotako neurriak langile guztiei zabaltzea beren egoerarekin bateragarriak badira, bai eta zerbitzuen araberako plantilla beharren azterketa egitea, egiturazko defizitak identifikatu ahal izateko.

Azkenik, belaunaldi errelebo eta talentua erakartzeko plana diseinatzea eta martxan jartzea, autokontzertazioa eta aparteko orduak progresiboki murriztea eta ezabatzea, sindikatu guztiekin Lehen Arretako eredu berriari ekitea, eta adinari lotutako konpentsazio neurriak barne hartzen dituen lan ibilbidea ezartzea galdegin dituzte.