TicketBAI sistema erabiltzeko baliabideak jarriko dizkie Kutxabankek enpresa bezeroei

BILBO 4 May. (EUROPA PRESS) -

Kutxabank finantza erakundeak ETE eta autonomoentzako neurri sorta berezia sortu du, Araba, Bizkai eta Gipuzkoako foru ogasunek 2022ko urtarrilaren 1etik aurrera ezarriko duten TicketBAI fakturazio sistema beren negozioetan abia dezaten.

Homologatutako softwarea sortu duen Billin sozietatearekin lortutako akordioari esker, Kutxabanken bezero direnek hobariazko baldintzetan eskuratu ahal izango dute fakturaziorako programa berria, eta deskontu nabarmenak lortuko dituzte ordainketak erakundeko txartelekin egiten badira.

Kutxabankek jakinarazi duenez, Billinen ezaugarrietako bat da Internetekin bat egiteko gailua baino ez duela behar erabili ahal izateko. 'As a service' deritzon softwarea izanik, ez da beharrezkoa bestelako kudeaketa sistematan inbertsio gehiagorik egitea.

Horrekin batera, Kutxabankek finantza ildo berezia sortu du digitalizazio maila txikia duten enpresentzat, behar dituzten tresna informatikoak eta horientzako programak errazago eskura ditzaten.

TicketBAI hiru foru aldundiek eta Jaurlaritzak elkarlanean sustatutako egitasmoa da, eta fakturazio softwareetan legezko betebehar tekniko batzuk ezarriko ditu, alor guztietan sortzen diren diru sarrerak kontrolatzeko eta zergen saihestea eragozteko.

Datorren urtean zehar sistema berria borondatez ezartzen duten ETE eta autonomoek kenkari fiskalak izango dituzte PFEZ-ko kuota osoan edo Sozietateen Zergan ekitaldi honetan egindako inbertsioen gainean. Azken kontsumitzaileei zerbitzuak eman edo produktuak saltzen dizkieten alorrei eragingo die batik bat sistema berriak, gehienak eskudirutan kobratzen baitira.

Bizkaiko eta Gipuzkoako aldundiek 2022ko urtarrilaren 1etik aurrera ezarriko dute TicketBAI sistemaren derrigortasuna, eta Araba apurka apurka bateratuko zaio, 2022an zehar.