Urtebi Txiki, Manttoni eta Urdin sagar barietateekin egindako sagardoek dute onarpen handiena

DONOSTIA, 29 (EUROPA PRESS)

Andoni Zuriarrain Euskal Herriko Unibertsitateko (EHU) Donostiako Kimika Fakultateko ikertzaileak sagar mota bakarreko sagardoak aztertu ditu, sagar mota bakoitzak ematen dizkion ezaugarriak aztertzeko. Horrela, ikerketaren arabera, Urtebi Txiki, Manttoni eta Urdin sagar barietateekin egindako sagardoek lortu dute onarpen handiena jendartean.

Ikerketa Andoni Zuriarrain ikertzailearen (Donostia, 1988) doktore tesiaren barruan egin da. "Sagar barietatearen eta polifenolen eragina Euskal Herriko sagardoaren ezaugarrietan" izenburua du tesiak, eta Iñaki Berregi Abalde EHUko Kimika Fakultateko Kimika Aplikatua Saileko irakaslea izan du zuzendari. Lan osoan zehar Gipuzkoako Sagardogileen Elkartearen laguntza eta babesa izan dute.

Oro har, Euskal Herrian sagardoa egiteko sagar mota ezberdinak nahasten dira, eta sagar mota bakoitzak banaka duen jarrera ezezaguna da. EHUko Kimika Fakultateko ikerketan sagar mota bakarreko muztioetatik abiatuta, sagar barietate bakarreko sagardoak egin dira, sagar mota bakoitzak sagardoari ematen dizkion edo eman ahal dizkion ezaugarriak zehazki aztertzeko.

"Hain zuzen ere, sagarretan dauden polifenolak aztertu ditugu. Gaitasun antioxidatzailea duten osagai horiek oso garrantzitsuak dira, batetik, zapore mikatza eta astringentzia (ahoko lehortasuna) eragiten dituztelako, eta bestetik, sagardoa iluntzeko prozesuan esku hartzen dutelako, oxidatzen direnean konposatu ilunak sortuz. Halaber, uhertasuna eta sedimentuak sortzen dituzte proteinekin batzen direnean", azaldu du Andoni Zuriarrain ikerketaren egileak.

Horretarako, bertako 14 sagar barietate hautatu eta aztertu dira hiru urtetan. Sagar zuku bakoitzaren profil polifenolikoaren bilakaera aztertu da, alegia, bakoitzaren indar antioxidatzailea, proteinekin hauspeatzeko gaitasuna, uhertasuna, iluntze prozesua eta abar neurtu dira. "Hala ere, sagar mota bakarreko zukuekin sagar mota horren ezaugarriak nabarmentzen dira, eta askotan muturreko sagardoak lortzen dira", esan du.

Horrenbestez, ikuspegi orokorrago bat izateko eta sagardoa egiteko sagar nahasketa aproposena zein den jakiteko asmoz, "zenbait nahasketa kontrolatu" ere egin dituzte ikerketan. Bukaeran, lortutako sagardo guztiak, sagar mota bakarrekoak zein nahasketak, Fraisoro Ingurumen eta Nekazaritza Laborategira bidali dituzte, hango aditu talde batek dastatzeko.

Aditu taldeak puntuazio bat ematen dio sagardo bakoitzari hainbat irizpide kontuan hartuta, eta horrela jakin dezakete, hain zuzen ere, sagardo horiek zenbateko onarpena izan dezaketen kontsumitzaileen artean. "Datu hori oso garrantzitsua da, azken batean, sagardoa kontsumitzeko egiten baita" azpimarratu du ikertzaileak.

BARIETATE OREKATUENAK

Ikerketak zehaztu duenez, Urtebi Txiki, Manttoni eta Urdin sagar barietateen sagardoak orekatuenak izan dira eta onarpen handia lortu dute jendartean. Halaber, notarik altuena lortu dute Fraisoro laborategiko dastaketa taldean.

"Gezamina sagarrarekin egindako sagardoa izan da guztietan bereziena. Kontsumitzaile bezala, ohituta gaude nolabait sagardoak era batekoak izatera, ezberdintasunak ezberdintasun. Gezaminarekin egindako sagardoa, ordea, oso mikatza eta koloreari erreparatuta iluna, garagardoaren antzekoa dela ikusi dugu. Moko, Merabi eta Narbarte Gorria muturreko sagardoen taldean sartu ditugu, oso mikatzak eta gaziak (azidoak) baitira", azaldu du.

Nahasketen artean, nahasketa bitarrek jaso dute puntuaziorik altuena. "Hauek dira puntuaziorik altuena lortu duten nahasketak: Goikoetxea %40 gehi Moko %60, Narbarte Gorria %36 gehi Urtebi Txiki %64, Manttoni %62 gehi Udare Marroi %38, eta Frantses Sagarra %33 gehi Manttoni %67", zehaztu du Zuriarrainek.

Ikertzaileak uste du ikerketako datuak sagardogileentzat edo sagardoa ekoiztu nahi duen ororentzat baliagarriak izan daitezkeela, "sagarrondoak landatzeko garaian kontuan hartzeko edota irizpide horiek esku artean dituztela zer nahaste egin erabakitzeko".