VIGO 28 Oct. (EUROPA PRESS) -

O 36,75 por cento das empresas galegas realizou investimentos en I+D+i durante o ano pasado e o seu gasto respecto ao seu volume de vendas foi superior ao da media nacional. Así o reflexa o 'Informe Ardán 2009' feito público hoxe pola Zona Franca de Vigo, que valora "o esforzo" que supón este tipo de accións, que resultan "determinantes" para aumentar a competitividade das compañías.

Segundo os datos que recolle este estudio de carácter anual, a maioría das "innovacións" céntranse nos novos produtos e na mellora dos procesos de fabricación. Un dato que destaca o informe é que a inversión en I+D+i respecto ás vendas totais das empresas galegas alcanza o 2 por cento, mentres que o seu impacto final nestes resultados chegou ao 5 por cento.

A cifra de gasto sitúase por enriba da media nacional do 0,9 por cento e mesmo supera o dato das 35 compañías que cotizan no selectivo IBEX da Bolsa española, que se acha no 1,6 por cento. Á súa vez, está moi preto do 2,15 por cento declarado no conxunto da Unión Europea.

O 'Informe Ardán 2009' conclúe que existe un alto grao de concienciación nas empresas galegas por mellorar a súa produtividade mediante a innovación, aínda que "non chegaron" ao nivel das principais nacións comunitarias.

Dentro dos sete sistemas produtivos aos que se cingue o estudio neste sentido, o 73 por cento das empresas incorporaron melloras na súa produtividade. Delas, as que máis esforzos realizan son as dedicadas á industria auxiliar, aos transportes, ao sector agroalimentario e ao da madeira.