O custo dunha conexión dun megabyte roldará os 40 euros, aparte do prezo do hardware e a súa instalación
SANTIAGO DE COMPOSTELA, 23 Abr. (EUROPA PRESS) -
SES Astra e a operadora española NET2 darán cobertura de banda ancha a todo o rural galego vía satélite e a través dun sistema bidireccional que garantirá a recepción de datos da rede e o seu posterior retorno a unha velocidade que mellora as anteriormente ofertadas. O custo dunha conexión dun megabyte de baixada roldará os 40 euros, importe que se asemellará ás ofertas dos operadores urbanos.
Así sinalouno a Europa Press o director de desenvolvemento de negocio de banda ancha de SES Astra, José Luis Gárate, quen hoxe se reuniu en Santiago, xunto a representantes de NET2, coa Asociación Galega de Empresarios Instaladores de Telecomunicacións para presentarlles a proposta de ambas as dúas sinaturas.
Gárate recordou que en España un 9 por cento da poboación non dispón de acceso á banda ancha, unha proporción que representa 4 millóns de persoas e máis dun millón de fogares que están localizados en zonas rurais, segundo recente un informe da Comisión Europea.
"A cifra de Galicia supera ese 9 por cento", estimou, malia recoñecer a dificultade de contar con datos exactos. O responsable de Astra apuntou ás características orográficas do territorio galego e á grande dispersión da súa poboación.
"Os gobernos están a intentar que o campo non se descolgue porque a banda ancha é fundamental para o desenvolvemento económico de calquera rexión", expuxo, tras indicar que dos 1.000 millóns de euros habilitados pola Comisión Europea para contribuír á implantación deste servizo nas zonas rurais comunitarias, España obterá 81 millóns.
MELLORA DE PREZOS
Malia admitir que a velocidade da conexión ofertada non será tan elevada como a dos operadores de ADSL urbanos, Gárate destacou que os prezos fixados se achegan moito aos das cidades e melloran os anteriormente establecidos para o acceso a internet vía satélite.
Os usuarios terán cobertura de banda ancha mediante unha antena de 80 centímetros e un "sinxelo" modem, un hardware que custará 390 euros máis o prezo da instalación. "Antes o prezo disparábase como mínimo a 3.000 euros e só o podían asumir as administracións públicas ou as grandes empresas", indicou.
O responsable de Astra subliñou que a compañía dispón xa de 40.000 usuarios en toda Europa, tras implantar este sistema nunha ducia de países, que contou cun "especial éxito" en Francia e Alemaña. Ao seu xuízo, a principal vantaxe da conexión vía satélite é a súa capacidade de chegar "a calquera punto do territorio" e que, ademais, permitirá aos usuarios acceder ás máis de 300 canles de televisión que ofrece Astra.
A distribuidora deste servizo será a sinatura española NET2, que con Astra aspira a estender a súa implantación ao conxunto da Península Ibérica e a Baleares. Segundo afirmou Gárate, este produto dirixirase a un público obxectivo que evitará a competencia de ambas as dúas empresas con outros operadores "como R ou Teléfonica".
