Desenvolve actualmente a súa actividade en catro centros en Pontevedra, Santiago e Vigo

A CORUÑA, 8 Jul. (EUROPA PRESS) -

O Consello Superior de Investigacións Científicas (CSIC) traballa "activamente" na construción en Galicia de tres novos centros de investigación, dos que dous estarán situados en Santiago de Compostela e un en Vigo.

Así trasladoullo hoxe coordinador institucional en Galicia do CSIC, Uxío Labarta ao delegado do Goberno en Galicia, Antón Louro, ao que presentou a memoria de actividades do CSIC en Galicia durante 2008, así como as liñas de traballo do mesmo no ámbito de investigación na Comunidade.

Nestes momentos, o CSIC está a traballar na construción de tres novos centros de investigación científica en Galicia. Concretamente, trátase do Centro Atlántico de Investigaciones Marinas (CAIM) no ámbito da I+D mariña, en colaboración coa Universidade de Vigo e que estará situado na capital olívica; o Centro de Ciencias e Tecnoloxías da Vida (Citev) e o Centro de Ciencias do Patrimonio Cultural, ambos os dous situados en Santiago de Compostela.

O Centro de Ciencias e Tecnoloxías da Vida (Citev), iniciativa que se desenvolve en colaboración coa Universidade de Santiago de Compostela, centrarase no deseño, desenvolvemento e avaliación de estratexias terapéuticas a partir do coñecemento dos mecanismos moleculares, celulares e fisológicos das enfermidades.

O Centro de Ciencias do Patrimonio Cultural, en colaboración co Consorcio de Santiago, terá, entre outros obxectivos, o estudio, a conservación, a posta en valor e a xestión sostible do patrimonio cultural e inmoble e das paisaxes históricas e culturais.

ACTIVIDADE EN GALICIA

O CSIC é o maior organismo público de investigación en España e o terceiro a nivel europeo e está adscrito ao Ministerio de Ciencia e Innovación, a través da Secretaria de Estado de Investigación.

En Galicia, desenvolve o seu traballo en catro centros de investigación, a Misión Biolóxica de Galicia (Pontevedra); o Instituto de Estudios Padre Sarmiento (Santiago de Compostela); o Instituto de Investigacións Mariñas (Vigo) e o Instituto de Investigacións Agrobiolóxicas de Galicia (Santiago de Compostela). Tamén participa no Centro de supercomputación de Galicia (Cesga).

Durante o ano 2008, desenvolvéronse nos centros de Galicia 139 proxectos de investigación. Neste ano traballaron nestes centros 461 persoas, das cales 122 son investigadores (entre persoal propio e contratado); 150, persoal técnico; 69, de administración e servizos; 116, persoal en formación e catro estanzas internacionais.

PRODUCIÓN CIENTÍFICA

En canto á produción científica do CSIC en Galicia, no ano 2008 contabilizáronse 341 publicacións das que 194 foron artigos científicos, 58 artigos científicos, 16 libros, 61 capítulos de libros e 12 patentes.

Toda a actividade do CSIC en Galicia supuxo unha inversión de 18,5 millóns de euros en investigación. Desta inversión, unha das actuacións foi a ampliación das instalacións da Unidade de Tecnoloxía Mariña-Sede Atlántica, coa compra dunha nave en O Porriño para dar apoio loxístico aos buques xestionados por este organismo. En concreto, son dous os buques oceanográficos adscritos a esta unidade: o 'García del Cid' e o 'Sarmiento de Gamboa'.