SANTIAGO DE COMPOSTELA, 27 Ene. (EUROPA PRESS) -
A multinacional galega Blusens Global Corporation, especializada en electrónica de consumo de última xeración, asegurou hoxe que o seu dispositivo de entretemento doméstico Blu:brain disporá de "unha das máis importantes" tecnoloxías de procesador de medios para HDTV e permitirá ao usuario "gozar dos contidos en todo momento e lugar".
Segundo anunciou nun comunicado de prensa o director de mercadotecnia do ente, Miguel Churruca, o centro de entretemento multimedia Blu:brain empregará unha solución "avanzada" de tipo "sistema sobre chip" da compañía Sigma Designs --o chipset SMP8634-- como "principal" unidade de procesamento.
Así mesmo, explicou que Blusens elixiu este chipset pola súa "capacidade especializada" para a decodificación de alta definición, co cal se asegura aos consumidores a "máxima fiabilidade" á hora de visualizar video de alta calidade e engadiu que valoraron a "grande compatibilidade" do SMP8634 "facilitando a súa integración e mellorando a experiencia do usuario".
Pola súa banda, o vicepresidente de mercadotecnia estratéxica de Sigma Designs, Ken Lowe, afirmou que Blusens seleccionou esta empresa polas "solucións" que desenvolve para utilizar en produtos de consumo de alta definición.
INNOVACIÓN E DESENVOLVEMENTO
O Blu:brain é un centro de entretemento multimedia de alta definición (HDTV) que xestiona, reproduce e distribúe contido audiovisual entre múltiples dispositivos. O novo aparato incorporará un disco duro, dobre sintonizado e un sistema de almacenamento Network Attached Storage (NAS).
Tamén incluirá un sistema de streaming de video, xa sexa dende internet, remotamente dende un ordenador ou a través das diferentes conexións AV do artefacto. Deste modo, como apuntou a empresa, permítese ao usuario o acceso "remoto" a contidos de videos multimedia dende o ordenador ou o teléfono móbil.
Blusens Global Corporation é unha multinacional fundada en Santiago en 2002 pioneira no ámbito do ocio multimedia que dedica "máis do 10 por cento" dos seus ingresos a actividades de innovación e desenvolvemento.
