VIGO 16 Jun. (EUROPA PRESS) -

A empresa viguesa Bluguia, dedicada ao desenvolvemento de guías turísticas mediante GPS, foi elixida hoxe como unha das 10 finalistas aos Premios Dell-Cepyme á Excelencia Tecnolóxica 2009, galardón que recoñece as empresas de ata 100 empregados que usan a tecnoloxía para dar un mellor servizo aos seus clientes.

Segundo informou hoxe a Cámara de Comercio de Vigo, as dez finalistas serán obsequiadas cun portátil profesional e terán a oportunidade de converterse en gañadores nacionais, optando a un premio de 20.000 euros en produtos e servizos Dell. Ademais, o gañador español presentarase automaticamente ao concurso internacional, cuxo premio pasará dos 20.000 aos 35.000 euros.

En setembro farase público o nome do gañador nacional seleccionado entre estes dez finalistas por un xurado composto por membros de Dell, a Confederación Española de Pequena e Mediana Empresa (Cepyme), ICSB e por Jaime Lanchares, CEO de Unkasoft, a compañía gañadora a nivel nacional en 2008.

Ademais, Bluguia, que forma parte do viveiro de empresas da Cámara de Comercio de Vigo dende o pasado ano, tamén foi seleccionada recentemente para participar na Escola Banespyme-Orange.

Nesta primeira fase do concurso participan as 20 mellores ideas de negocio nacionais no ámbito das tecnoloxías innovadoras, ás que se lles proporcionará formación e unha titoría personalizada polo IE Business School.

Desta vintena de proxectos seleccionaranse 10, que optarán a unha segunda fase de formación especializada e presentación ante un panel de investidores.