OURENSE, 9 Oct. (EUROPA PRESS) -
O novo Centro de Investigación, Transferencia e Innovación (CITI), da Universidade de Vigo e instalado en Ourense, márcase o obxectivo de "potenciar e desenvolver o I+D+i" no sector empresarial, situado no Parque Tecnolóxico de Galicia (Tecnopole).
O conselleiro de Educación e Ordenación Universitaria, Jesús Vázquez Abad, inaugurou hoxe o novo espazo, composto de cinco edificios mediante unha estrutura de catro módulos conectados por unha pasarela que acollen laboratorios e plantas técnicas.
"As tarefas de investigación que desenvolve contan coa garantía da súa eficacia, á hora da creación de espazos de cooperación entre a universidade e o tecido empresarial máis comprometido co progreso e o benestar da nosa sociedade", sinalou.
Concretamente, albergará doce grupos de investigación a través dos laboratorios de Biotecnoloxía Agroalimentaria; Bioquímica; Enxeñaría Química; Física aplicada, Física da atmosfera e do océano; Microbioloxía; Toxicoloxía e Seguridade Alimentaria e Ambiental; Valorización de Biomasa; Informática aplicada, Informática gráfica e multimedia; Sistemas informáticos de nova xeración e Web de Agentes Intelixentes.
