VIGO, 9 Nov. (EUROPA PRESS) -

Vigo será a sede permanente do primeiro centro de formación e innovación para traballadores do sector da automoción, que o Cluster de Empresas da Automoción de Galicia (Ceaga) porá en marcha no primeiro trimestre de 2010, coa colaboración do Massachusetts Institute of Technology (MIT) e o apoio da Xunta.

Así o anunciou hoxe o presidente do Goberno galego, Alberto Núñez Feijóo, tras manter unha reunión na cidade olívica con responsables de Ceaga e co director executivo do MIT, Richard Lewis; e onde destacou que este centro, que se dedicará á formación dos propios traballadores do sector do automóbil galego, será o primeiro de España destas características e aspira a ser un "referente".

Richard Lewis destacou que, no caso do MIT, a universidade técnica máis importante de EE.UU., participa a Administración, a industria e as institucións investigadoras, algo que é "moi similar" ao caso do cluster galego do automóbil. Así, avogou por "trasladar e compartir con Ceaga" a experiencia adquirida ao longo dos anos, co obxectivo de facer que as empresas sexan "máis competitivas", poña en marcha novos produtos "con máis rapidez" e que poidan abrirse un oco no mercado.

Pola súa banda, o presidente de Ceaga, Francisco Anguera, destacou que o obxectivo é que todos os traballadores pasen por este novo centro formativo xa que o que se pretende é "un cambio cultural" nos operarios.

O xefe do Executivo autonómico recordou que se está a traballar coa "maior flexibilidade posible" con todos os sectores industriais, especialmente coa automoción, --que cualificou como un ámbito "crave"--, para buscar "acordos" e seguir competindo.

APOIO

"Non imos renunciar á industria da automoción", asegurou o presidente, quen recordou que o Goberno galego toma as súas "precaucións" para salvagardar a este sector, que emprega máis de 21.000 persoas e supón o 35 por cento das exportacións galegas, facturando máis de 8.400 millóns de euros; e facer que non se perda "a consecuencia da crise e da reestruturación" que o afecta en ámbito mundial

Así, Feijóo recordou a axuda á automoción no que respecta ao seu plan estratéxico, os máis de 15 millóns de euros destinados a axudas directas á compra de vehículos ou a liña de 60 millóns de euros de axudas á industria de compoñentes.

A estas iniciativas, sumou agora o apoio ao citado centro de formación e innovación para o sector da automoción -no que colaborarán Ceaga e o MIT-- para o que a Xunta se compromete a facilitar unha "sede permanente" na cidade olívica e que se determinará en cuestión de "semanas".

Así mesmo, destacou que se seguirá valorando "tódalas alternativas" para poder facer fronte e "saír reforzados" da crise e avogou por "saber as prioridades, onde inverter e onde buscar socios". No caso do novo centro de formación, destacou que Ceaga atopou o "socio máis sólido" mentres que o MIT "sabe" que en Galicia hai 21.000 traballadores, que ten a planta automobilística máis produtiva de Europa e que "somos competitivos".

En canto ao financiamento de actividades formativas, Núñez Feijóo afirmou que a formación é unha "prioridade" para a Xunta, e recordou que hai programas de formación da Consellería de Traballo e Benestar, así como varios convenios asinados, polo que descartou que vaia haber "problemas" no cofinanciamento de actividades formativas entre a Xunta e a industria.