SANTIAGO DE COMPOSTELA 29 Abr. (EUROPA PRESS) -

As tres universidades galegas colaborarán en proxectos de I+D+i para o sector da madeira, cos que o Clúster de Galicia pretende achegarse así ao seu propósito de lograr nun prazo de dez anos duplicar a súa achega á economía galega. Este é o reto establecido no seu Plan Operativo da Madeira. Na actualidade, a súa facturación é 2.419 millóns de euros e dá emprego directo a 26.000 persoas.

"É un obxectivo ambicioso pero alcanzable", admitiu o reitor da Universidade de Santiago, Senén Barro, quen xunto aos seus homólogos da Coruña, José María Barja, e Vigo, Alberto Gago, asinaron hoxe un convenio de colaboración co presidente do Clúster de la Madera de Galicia, José Blanco.

Todos eles coincidiron na importante achega das universidades a través dos grupos de investigación e formación especializadas dos seus estudantes para a aplicación de innovación e tecnoloxía neste sector.

As tres institucións avanzaron a posibilidade de creación de grupos conxuntos segundo o proxecto, "como unha UTE", comparou Senén Barro, en referencia á Unión Temporal de Empresas, "aínda que neste caso sería UTI", bromeu con respecto ao seu carácter investigador.

"Trátase dunha simbiose importante que reforzará as garantías de éxito do Plan Operativo", augurou Senén Barro, quen agradeceu a "confianza" o clúster con respecto ás universidades para facelos partícipes na consecución deste obxectivo.

FACER "VISIBLE" A COLABORACIÓN DA UNIVERSIDADE.

Ao que o presidente do CMA respondeu valorando a "sensibilidade" das tres institucións académicas para traballar "conxuntamente" en lograr a "máxima competitividade" do sector.

"Gústanos facelo. É onde debemos estar, non é unha obriga", esgrimiu o reitor da Universidade de Vigo, Albergo Gago, quen non ocultou que lles gusta "dar un paso máis" nunha colaboración "visible" a través de proxectos concretos en actividades "de suma utilidade para o país".

Na mesma liña pronunciouse o reitor da Universidade da Coruña, José María Barja quen aproveitou para recordar a colaboración desta institución co sector da madeira a través da escola de arquitectura ou o o deseño de mobles para a Feira de Milán.

No entanto, aclarou que esta colaboración non debe limitarse ao ámbito do deseño -- que considerou "moi importante -- senón tamén a outra áreas, entre as que apuntou a construción. Precisamente, lembrou que o 90 por cento das vivendas en Estados Unidos son de madeira "un dato que ás veces esquecemos" lamentou.