SANTIAGO DE COMPOSTELA, 20 May. (EUROPA PRESS) -

A empresa Televés presentará a próxima semana na Feira do Cable, Satélite e Multimedia de Colonia (Anga Cable) a nova DAT HD, a primeira "antena intelixente" desenvolvida especificamente para a Televisión Dixital Terreste e a futura televisión de alta definición.

A nova antena, que Televés cualificou de "auténtico fito", será presentada en ANGA Cable, que se celebrará na cidade alemá de Colonia do 26 ao 28 de maio. A DAT HD foi desenvolvida tendo en conta as "particulares características" do sinal dixital, para "aproveitar todo o seu potencial e garantir a recepción en óptimas condicións" da televisión de alta definición.

Segundo sinalou Televés, o elemento que converte a DAT HD nunha "antena verdadeiramente revolucionaria" é o 'Boss Tech', unha tecnoloxía que permite regular "de xeito automático" o nivel do sinal de saída.

ANGA CABLE

Televés participará na feira Anga Cable baixo o lema 'Tecnoloxía europea fabricada en Europa', coa intención de mostrarse ante o sector como unha compañía capaz de "continuar sendo unha referencia en calidade e o líder mundial en desenvolvemento tecnolóxico de antenas e equipos para a recepción, distribución e medición do sinal de televisión".

Para isto, a compañía inverterá en investigación e desenvolvemento o equivalente ao 5 por cento da súa facturación total. Ademais, Televés realizará directamente nas súas propias instalacións todo o proceso de fabricación dos seus produtos, o que permitirá "ofrecer as máximas garantías de fiabilidade e calidade".

Ademais, entre as novidades de produto que Televés presentará en ANGA Cable, a compañía destacou a súa nova gama de medidores de campo portátiles H45, o primeiro equipo deste tipo que incorpora o procesado dixital.

A antena Diginova, concibida especificamente para vivendas unifamiliares, e o novo sistema de conexión para cable coaxial EasyF tamén terán presenza no stand de Televés na feira de Colonia.