SANTIAGO DE COMPOSTELA, 3 Abr. (EUROPA PRESS) -

A décima edición do encontro informático Xuventude Galiza Net --promovido pola Dirección Xeral de Xuventude-- arrancou hoxe en Santiago de Compostela cunha participación prevista ata o próximo domingo de 1.800 mozos de entre 16 e 35 anos.

Este ano, por primeira vez dende que se puxo en marcha a iniciativa, o punto de encontro será o Multiusos Fontes do Sar, onde os participantes terán a súa base de actividade durante os tres días que dura o encontro.

Existen dúas maneiras de participar no Xuventude Galiza Net: por un lado, está o terreo dirixido exclusivamente aos mozos que están inscritos para acceder á intranet do evento, situada na pista central do Multiúsos. Alí estarán situadas 1.800 persoas cos seus ordenadores, conectados por máis de 40.000 metros de cable, a unha velocidade de 1 gigabit. Estes mozos poden participar ademais en diversas actividades lúdicas creativas conferencias e talleres arredor da actualidade informática.

Outro modo de participar neste evento informático é entrando ao espazo aberto, libre e totalmente gratuíto habilitado no vestíbulo do Multiúsos. Nesta extranet sitúanse os stands da Dirección Xeral de Xuventude, organizadora do evento, e das distintas empresas patrocinadoras; espazos para xogar ás videoconsolas máis novidosas; zonas de talleres; e outras actividades lúdicas para xente de todas as idades.

Todas as persoas que se acheguen ata a extranet do Xuventude Galiza Net poderán participar en diversos concursos, asistir ás conferencias programadas e, tamén á proxección da película 'Pérez 2, o ratoncito dos teus sonos', unha produción cinematográfica que será proxectada de forma gratuíta por Filmax Animation. A proxección será o sábado ás 19.00 horas en Fontes do Sar.

NOVIDADES

Nesta edición do Xuventude Galiza Net as novidades xiran arredor da robótica. Se o pasado ano se fixo unha breve incursión neste ámbito, nesta ocasión levarase a cabo, coa colaboración da organización IEEE, a primeira edición do Campionato Internacional de Robótica XGN-IEEE. Neste campionato competirán máis de 100 robots chegados principalmente de Galicia, Madrid, Valencia, Reino Unido, Italia, Francia e Portugal. Estes robots realizarán diversas probas pola que serán puntuados para proclamar os gañadores.

Así, os robots tomarán parte en probas de loitas de sumo; circuíto de velocidade; circuíto de habilidade; labirinto coñecido; e labirinto descoñecido. Ademais, participarán nunha carreira de Fórmula 1, emulando á carreira que terá lugar no circuíto de Malaisia o domingo 5 de abril ás 8 horas.

Outra das novidades máis destacables é a visita do Embaixador de LEGO en España, que visitará o Xuventude Galiza Net para presentar as últimas novidades internacionais da marca, aínda non dispoñibles no mercado español. Ademais, a lingua, a cultura e o patrimonio galego terán tamén un espazo destacado dentro dos contidos deste importante evento informático.